Kalaallit saqisut amigaataapput

Akunnittarfinni neriniartarfinnilu ilinniartut aamma ikiliartorput. Ilinniartut inuunerat immaqa sunnertittarpoq imaluunniit suliffimmi oqaatsit atorneqartut sakkortuallaartarsimapput. Saqisutut ilinniartut arlallit ilinniarunnaartarput.

- Tamanna ajuusaarnarpoq takornariammi kalaallimik saqisoqarusunnerusaraluarput, savalimmiormiu neriniartarfimmi pisortaq taama oqarpoq nangipporlu:

- Takornariat kalaallimik naapitserusuttarput oqaloqatiginnikkusuttarlutillu. Taamaattumik pingaaruteqartorujussuuvoq kalaallit saqisutut sulinissaat, Ilulissani Hotel Arcticimi neriniartarfimmi pisortaq Ingerd á Rogvi taama oqarpoq.

Taanna ukiut pingasut sinnilaarlugit nunatsinni neriniartarfinni assigiinngitsuni sulisimavoq. Neriniartarfik kujasinnerpaaq suliffigisimasaa Narsarsuarmiippoq avannarpasinnerpaarlu Pituffimmiilluni.

Ingerd à Rogvip kalaallit saqisunngorniat qulit missaanniittut neriniartarfimmi pisortaanermini suleqatigisimavai – taakku arlaannaataluunniit ilinniarnerni naammassisimanngilaa. Neriniartarfinni oqaatsit atorneqartartut immaqa sakkortuallaarsimapput. Ingerd à Rogvi nammineq Savalimmiormiuuvoq saqisutullu Danmarkimi ilinniarsimalluni. Ilinniarnini nuannerpallaarsimanngitsoq ima oqaluttuaraa:

- Suunngitsutut misigisimasarama arlaleriarlunga saqisutut ilinniarnera unitsiinnangajattarsimavara. Nikassarneqartarpunga. Oqaatsit sakkortuut tusartarsimavakka immaqa Savalimmiormuunera peqqutigalugu akissanangalu pigiinnartarsimavakka, Ingerd á Rogvi oqarpoq.

Taanna aperaarput Savalimmiormiut kalaallillu arlaatigut assigiissuteqarnersut imalu akivoq:

- Savalimmiormiut kalaallillu assigiittorujussuupput. Qanilaartuuvugut oqaluunneqartillutalu akinissarput ornigivallaartarnatigu. Danskisulli makitaniartuunngilagut amerlanertigullu tunuarsimaalaartarluta, Ingerd á Rogvi taama naggasiivoq.