Kalaallit Saamit Nunaanni iluatsitsilluarput

Norgep avannaani Saamit Nunaanni Riddu Riddu festivali, Europami nunat inoqqaavisa kulturikkut festivalerfiini pingaarnersatut taagorneqartoq, ullumi naggataarneqarpoq.

Allattoq Elisa Isaksen

juulip 15-at 2012 15:45

Inuusuttut arlallit Nunatsinneersut peqataapput, soorlu nipilersoqatigiit Torluut Nuummeersut, ippassaq unnukkut nipilersorput.

Kalaaleq Kristian Mølgaard, Oslomi isiginnaartitsisartunngorniarfimmi ilinniartuusoq, ippassaq tusarnaartitsinermi tusarnaartuusoq oqarpoq, Torluut-ikkut tusarnaartitsinerat iluatsilluaqisoq.

- Tusarnaartitsinerat tusarnaariartorpassuarnit nuannarineqaqaaq, Kristian Mølgaard oqarpoq, oqaluttuaralugulu Torluummi erinarsortut ilaat Mike Fencker Thomsen tusarnaartitsiviup qaavanut periarluni aamma erinarsorsimasoq.

Kristian Mølgaard ammaanersiornermut atatillugu uaajeernermik takutitseqataavoq, peqatigalugit Vivi Sørensen aamma kalaaleq isiginnaartitsisartoq Elisabeth Heilmann Blind, Saamit Nunaanni najugaqartoq. Taanna aamma uaajeernermik ilinniartitsivoq.

Festivalimi aamma qilaatersortoqarpoq, Hivshu, Robert Peary Qaanaameersoq qilaatersorami, Buuti Pedersen qalipakkaminik saqqummersitsilluni aamma filmi Nordafar, Kangerluarsorutsimut tunngasoq takutinneqarluni.

- Kalaallit peqataasut saqqummiussaat alutorineqarluarput, Kristian Mølgaard Riddu Riddu-mit oqarasuaatikkutoqaluttuarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.