Kalaallit Røde Korsiat nuna tamakkerlugu katersuinialersoq
Røde Korsip Nunatsinni immikkoortortaqarfiata 100.000 koruunit Nepalimi ikiuiniarnermut sapaatip akunnerani kingullermi tunissutigereerpai, annerusumilli iliuuseqarusulluni.
Maannakkorpiarmi immikkut ittumik ikiorsiisoqarnissaa pisariaqartinneqarpoq.
Taamaattumik SMS-ikkut aningaasanik katersiniartoqarnissaa maanna aaqqissuunneqarpoq, Nunatsinni innuttaasut taamaalillutik nunamut piitsooqisumut qaqqartuumut tassunga, Mount Everestip ataaniittumut aningaasanik tapiissuteqarsinnaaniassammata.
SMS-ikkut tapiissuteqartoqarsinnaassaaq
SMS aqqutigalugu aningaasanik tapiisinnaanissamik ammaassiniarluni Tele-Post nalunaaruteqarpoq tamatumalu saniatigut KNR katersiniarnermut tunngatillugu ullumimiit qaammammi ataatsimi akeqanngitsumik ussassaariniarluni nalunaaruteqarluni.
Kalaallit Røde Korsiata misilittagai naapertorlugit ajunaarnersuaqartillugu katersuiniarnernut kalaallit takutitsilluartartuupput.
- Taamaattumik katersuiniarnermut uunga atatillugu aamma tapersiilluarnissaat neriuutigaarput, ikiuiniaqatigiit allapput.
SMS-ikkut katersuiniarnermi sianerfissap normua aqagumit piareerneqarsinnaassasoq Kalaallit Røde Korsiata naatsorsuutigaa. Nuna tamakkerlugu katersuiniarneq juunip 30-ata tungaanut ingerlanneqassaaq.