Kalaallit Røde Korsiat inuusuttunik pikkorissartitsisoq

Pikkorissartitsinermi inuusuttut tallimat nammineq kajumissusertik tunngavigalugu suleqataasinnaanngorlugit, Inuusuttut Nukittoqatigiinni aamma suliniummik Inua'mik taagorneqartumi ilinniartinneqarput.

Inuusuttut 22-t 33-llu akornanni ukiullit Ilulissani inuusuttunik sammisassaqartitsinissaat siunertaavoq.

- KRK-Inua isumaqarpoq inuusuttut tamarmik piginnaaneqartut. Taama piginnaaneqarnerat atorlugu allanngueqataarusuppugut, Inuusuttunut siunnersorti Elisa Berthelsen Leth oqarpoq.

Sapaatip akunnerata naanerani inuusuttut ilaatigut suleqatigiinnermik, sullissinermik, sammititassanik pilersaarusiornermik aamma tarnikkut ikiueqqaarsinnaanermik ilinniartinneqarput.

Kalaallit Røde Korsiata inuusuttai siorna ukiakkut aallarnerneqarput.

INUA suliniutaavoq ukiunik pingasunik sivisussuseqartoq, ilaatigut Aningaasaateqarfik Villumimit allanillu aningaasalersorneqarluni ingerlanneqartoq.
 

Suliniaqatigiiffik assingusunik pikkorissaaleruttorpoq, maannamuugallartoq Nuummi, Ilulissani Aasiannilu, kiisalu taakku arlaata nunaqarfiani ataatsimi.
 
Qeqertarsuatsiaat nunaqarfinni siullersaalluni pikkorissaavigineqarpoq.