Kalaallit Røde Korsiat ingerlalluarluni 20-liinersiorpoq
Ukiut 20-t siulliit nikalluallarnartoqartarlunilu nuannaajallannartoqartarnikuuvoq. Ukiunili makkunani pitsaasumik ineriartortitsisoqarmat siulittaasup siunissaq isumalluarnartoqarsoraa.
-Kattuffiit allat assigalugit piumassutsiminnik sulerusuttut ingerlatsipput. Qujanartumillu Kalaallit Røde Korsiat tapersersorusullugu sulerujusuttut amerlaqaat. Taamaalilluta immikkoortortavut sumiiffinni assigiinngitsuniittut ingerlasinnaapput, amerlanerusunilli immikkoortortaqalerusukkaluarpugut. Taamaalilluta aamma nunami tamani suliariniakkagut naammassisinnaassagatsigit, Tove Blidorf, ukiuni kingullerni sisamani Kalaallit Røde Korsianni siulittaasuusimasoq oqaluttuarpoq.
Ikiueqqaarnermut pikkorissarnerit Røde Korsimit isumagineqartuarnikuupput, tamannalu Kalaallit Nunaanni allaanerunngilaq. Tamakkua atornikuerniarfiillu Kalaallit Røde Korsiannik ingerlatsisuupput.
-Ukiuni kingullerni ikiueqqaarnermik pikkorissaanernut ilinniutitysialannik peqalernikuuvugut, taakkualu kalaallisut qallunaatullu ingerlanneqartarlutik. Taakkua aamma assigiinngitsunik pisoqartillugu atorneqarsinnaasutut akuerineqarnikuupput. Suliassatut nutaatut taasinnaavara tarnikkut ikiueqqaarnissamut pikkorissartarnissaq. Ilisarisimasatta akornanni tarnikkut eqqasuuteqartillugu ikiueqqaarsinnaanissaq pingaaruteqarpoq. Ikiueqqaarnerit taakkua marluk ksuliffeqarfinnitatorfissaqartinneqakkajupput. Ajutoortoqariataarnissaa eqqarsaatigalugu suliffeqarfiit sulisutik piareersimatinniartarpaat, nunatsinnilu suliffeqarninni isumannaallisaanermut tamanna sunniuteqarluarluni, Tove Blidorf knr.gl-imut oqarpoq.
Kalaallit Røde Korsiata atornikuerniarfiutaasa Kalaallit Røde Korsiata ingerlaannarsinnaanera qulakkeerpaat. Namminneq piumassutsiminnik ikiuuttut akunnerpassuit atoprnikuuaat, Kalaallit Nunaannilu inuppassuit nalinginnaat ikiuiniaqataallutik atisakuminnik tunniussisarnikooqalutik.
-Atornikuerniarfiit ukiumut miliuuni sinnilaarlugu isertitaqarfiusarput, tamannalu nersortariaqarpoq. Minngerunngitsumik pisinairfinni nioqqutit amerlanerit 100 koruunit ataallugit akeqartarnerat eqqarsaatigalugu. Pisisartut assigiinngeqaat, nuannaarutigaarali atisat ilusilersorluakkat akisuut atornikunik akoorneqarsinnaanerat inuusuttut ilikkarsimammassuk. Atisat akisuut ilusilrsorluakkat uagut nioqqutigisatsinnik akoorneqartarnerat alutorineqalernikooqaaq, Tove Blidorf nassuiaavoq.
