Kalaallit Roskildemi nuannapput
Ualiinnartoq Camp SygKlisterimi nuannattunnguaqalereersoq, kalaallit timmisartumi saqisut marluk Hannea Vængtoft Zaza Petersenilu KNR-ip naapippai. Taakku Danmarkimi sikkilertartut kattuffiata inuusuttortaasa katersuuttarfiliaannut ilaapput, KNR-ilu aqqusaarmat aneerasaartarfimmi seqinnisaarujoorput.
-Pilluarnaqaaq. Ukiumut ataasiarluta taamatut katersuuttarnerput nuannersupilussuusarpoq, inuimmi nuannaartorpassuit ilagalugit nuannertaqimmat, Zaza Petersen, katersuuttarfimmi maannammut fiistiataavissorsimallutik qiimaqaluni taama oqaluttuarpoq.
Roskildemi katersuuttarfiit aappaanni, Camp Homer kalaallit Roskildemi katersuuttarfiisa pisoqaanersaat KNR-ip aamma alakkarterpaa. Nuummiut atuaqatigiit 1988-miilli ukiut tamaasa tassani naapittarput nuannallutillu. Nico Chemnitzip ikinngutitoqqani tassani aliannaaqatigisarpai.
- Katersuuttarfimiittugut assigiiartupilussuuvugut, assullu nuannisartaqaagut. Maani naapittarnerput nuannertaqaaq. Ukiuni arfineq marlunni maaniinnikuunnginnama, ikinngutitoqqat takoqqillugit nuannisaqaanga.
Ingeniørinngorniaq Salik Isaksen, katersuuttarfiit eqqissisimanerusut ilaanni tupersimaarpoq, taannalu nutaaliorluni kalaallit Roskildemi katersuuttarfii katersorlugit attaveqaqatigiiffisiginnaasaannik Facebookimi qupperniliorsimavoq.
- Inuit sumiinnersut paasiniarlugu taamaaliorpunga, taamaalilluta kalaaleqativut allat ornillugit fiisteqatigisinnaaniassagatsigit, nassuiaavoq.
Ataaserlu Roskilderiartut isumaqatigiissutigaat. Kalaallinik tusarnaartitsisoqartarnera Roskildemi takussaanngippallaaqaaq.
- Kalaallit tusarnaartitsinissaat amigaatigiuaannarpara. Sume Ole Kristiansenilu maani tusarnaartitsimmata tusarnaartunut akuuvunga, kalaallilli tusarnaartitsisarnerat annikippallaaqaaq, Nico Chemnitz oqarpoq.
- Kalaallit tusarnaartitsisarneri amerlanerusinnaakutsoorput. Nive Nielsen siorna tusarnaarparput, aamma torraqaaq, Nunarpummi maani peqataatinneqartariaqarmat, soorlu Island nipilersoqatigiinnik marlunnik unnummut peqataatitaqartoq. Amerlanerusunik tusarnaartitsisoqartartuuppat torrassagaluaqaaq, Zaza Petersen oqarpoq.
- Nipilersoqatigiit Zikaza aappaagu tusarnaartitsisarfimmi orange scenemi tusarnaarusuppagut... Ole Kristianseniluunniit, Salik Isaksen illarluni oqarpoq.
Nive Nielsen 2011-mi tusarnaartitsimmalli Angulu 2005-imi tusarnaartitsimmalli kalaallit allanik tusarnartitsoqarsimanngilaq.