Kalaallit Røde Korsianni siulittaasortaaq atornikuerniarfimmi kajumissutsiminik sulileqqaartoq
Kalaallit Røde Korsianni siulersuisunik nutaanik toqqaasoqarpoq. Siulittaasunngortoq kajumissutsimik suliaqarfimmi assigiinngitsunik ilisimasaqarluarpoq.
Nuup atornikueerniarfiani kajumissutsiminik sulilerpoq, piffisallu sivikitsup iluani atornikueerfimmi aqutsisunngorluni, ukiup ataatsip iluani Nuup immikkoortortaqarfiani siulersuisunut ilannguppoq, Kalaallillu Røde Korsianni Nuna tamakkerlugu maanna siulittaasunngorluni.
Mia Rosing Nilssonimik ateqarpoq, Nina Kreutzmann Jørgensenilu paarlallugu Kalaallit Røde Korsiani siulittaasunngussaaq.
- Suliniaqatigiiffimmi Røde Korsimi suleqataalluni pissanganartorujussuuvoq , nunarsuarmi tamakkerlugu inunnik ikiuiniaqatigiinni ilaavugut, Mia Rosing Nilsson nalunaarummi allappoq.
- Tulluusimaarutigisarpara Nunatsinni aningaasatigut namminersortumik Røde Korsimi immikkoortortaqarfeqaratta, kajumissutsimik sulisut pikkorissut piumassuseqarluartullu peqatigalugit.
Siulittaasuusimasoq Nina Kreutzmann Jørgensen maanna siulittaasup tullerilerpaa.
Taassuma siulittaasuusimasup ukiuni sisamani siulittaasuuffigereerlugu nunarput qimallugu allanik unammilligassarsiorniarluni aallarneratigut atuuffik atuuffigilersimavaa.
