Kalaallit quliugaangata qulingiluat KNR-imi nutaarsiassanik isiginnaarlutillu tusarnaartarput
Misissuinerup inernerata takutippaa KNR innuttaasunit atorneqartupilussuusoq, nutaarsiassanullu tunngatillugu kalaalit quliugaangata qulingiluat ullut tamaasa ullulluunnii tamarluinnangajaasa KNR-imik atuisuusut.
-Kisitsisit taakku KNR-ip Kalaallit Nunaannut qanoq pingaaruteqartigineranik qanorlu atassuteqartigineranik takutitsisuupput. Innuttaasut isiginnaarlutalu naalaartarpaatigut, amerlanerillu isumaqarput pitsaasumik suliaqartugut. Tamannalu tanngassimaarutigeqalugulu nuannaarutigaarput. KNR-ip nunatsinni innuttaasunut tunngatillugu innuttaasunik kiffartuussinissamik pisussaaffimminik naammassisaqarneranik takutitsilluinnarpoq, KNR-imi nutaarsiassaqartitsinermi pisortaq Mikkel Bjarnø Lund oqarpoq.
Naalaartartut isiginnaartartullu isumaannik misissuinermi sammineqartoq alla tassaavoq KNR-ip kulturimut inuiaqatigiinnullu tunngatillugu pingaaruteqassusaata misissuiffigineqarnera. Tassani aamma kulturimut inuiaqatigiinnullu tunngatillugu paasissutissat pillugit KNR-ip tusagassiuutitut kalaallinit katersuuffiunera aamma takuneqarsinnaavoq.
-Kisitsisit takutippaat, KNR paasissutissatigut najoqqutarisassatut pingaaruteqarnerpaasoq. Tamannalu pisussaaffiliivoq. Suliassarlu taanna ullut tamarluinnaasa pimoorulluinnarlugu naammassiniartarparput. Innuttaasut paasissutissanik ilisimasanillu pitsaanerpaamik tunineqarnissaat qulakkeerniarlugu ineriartortuarlutalu pitsanngoriartortuassaagut. Tamanna annertuunik piumasaqaatitaqarpoq, piareersimavugulli, Kalaallit Nunaannimi tamat oqartussaaqataanerat peqqissumik ineriartortinneqassappat KNR-ip nukittuujunissaa pisariaqarpoq, Mikkel Bjarnø Lund naqissusiivoq.
