Nunasisut pillugit siunnersuisoqatigiinnut Danmarkimi qinersinissami kalaallit pernarlutik taaseqataasinnaallutillu qinigassanngortissinnaassapput. Københavnip Kommunea aatsaavissuaq taama aalajangiivoq.
Taama allappoq aviisi Politiken.
Peqataaniaraannilu maannangaaq nalunaartoqartariaqarpoq. Inuit taamaallaat 22-t qinigassanngortillutik manna tikillugu nalunaarsimapput.
- Qinigassanngortittut isumaga malillugu ikippallaarujussuarput, ataatsimiititaliarmi eqeersimaartuusariaqarpoq, nunasisoqarnermut Københavnimi borgmesteri, Jakob Hougaard, oqarpoq.
Nunasisut pillugit siunnersuisoqatigiinnut ilaasortassat 15-it qinerneqassapput, qinigassanngortikkusuttunillu allanik tutsiuttoqarnissaa neriuutigalugu, nalunaarnissaq aqagumut killeqartinneqaraluartoq tallimanngorpamut kinguartinneqarpoq.
Københavnip Kommunea nunasisoqarneq pillugu 1999-imili siunnersuisoqatigeeqalerpoq, pernarlunilu tassa aalajangerpoq, toqqaannartumik qinersisoqassasoq, tamannalu marsip ulluisa arfineq-aappaanni ingerlanneqassaaq.
Pappialat qinersissutissat Københavnip Kommuneata taasisinnaasunut 60.000-it missaanniittunut nassiussussavai. Qarasaasiaq atorlugu imaluunniit qinersivimmut ornigulluni taasisoqarsinnaassaaq.