Kalaallit qinersisinnaasut qassiunersut Københavnimi ilisimanngilaat
Københavnimi nunasisut 18-ileereersimasut Nunasisut akuunerulersinniarlugit siunnersuisooqatigiiffianni sinniisissaminnik marsimi qinersissapput, tassani kalaallit siullermeerlutik taasisinnaatitaassallutik. Kommune allappoq qinersisinnaatitaasunut qinersinermi atugassat februaarimi nassiussuunneqassasut, Københavnimili kalaallit qinersisinnaasut qassiunersut ilisimaneqanngimmat ajornartorsiortoqarpoq.
Københavnip Kommuneani nunasisut akuunerulersinniarlugit siunnersuisooqatigiiffianni kalaallit ataatsimik sinniisoqarsinnaatitaapput. Kalaallilli Københavnimi qasserpiaanersut ilisimaneqanngimmat siunnersuisooqatigiinnut qassit taasisinnaatitaanersut ilisimaneqanngilaq.
Inuup normuani angajoqqaat kikkuunerat takuneqarsinnaanngilaq. Nunatsinni inunngorsimasut kisimik normuminni ilisarnaaserneqartartut, nunasisut akuunerulersinniarlugit siunnersuisooqatigiit allaffeqarfiat ilisimatitsivoq.
Kalaallit Danmarkimi inunngortut danskisut isigineqarneq ajornertik pillugu qinersisinnaatitaannginerarsinnaammata Købehavnip kommunea aaqqiiniarsarivoq.
Eyvind Lyberth Nielsen qinerseqataajumalluni saaffiginnimmat ajornartorsiut paasineqarpoq. Angutaa danskiuvoq arnaalu kalaaliulluni. Inuunini tamaat Danmarkimi najugaqaraluarluni nunasisutut nalilerneqarami qinigassanngortinniarluni aalajangerpoq.
- Nunasisutut isigineqartuarsimallunga qinersisinnaatitaallunga qinigassanngortissinnaallungaluunniit paasigakku tupaallappunga. Immersugassaq immersoreerlugu kommuniliaakkakku tupaallapput kalaaliullunga qinigassanngortikkiartorama, 48-nik ukiulik, Naalagaaffiup Mittarfeqarfiani qarasaasiat pillugit siunnersorti, Eyvind Lyberth Nielsen Siunnersuisooqatigiillu sulineranni tapersersuilluarsinnaasutut misigisimasoq taama oqarpoq.
- Qinigaassagaluaruma kalaallit qinersisinnaasut tamarmik ujartorneqarnissaat suliniutigissagaluarpara, Eyvind Lyberth Nielsen kalaallit qinigassanngortittut pingajuat taama oqarpoq.
