Kalaallit qimmerpassui naalliutsitat
Nunatta avannaani qimmeqarfiusuni qimmerpassuarnik ulloq manna tikillugu naalliutsitsisoqartaqaaq. Qimmit ilaasa kigutaat kaattamik aserorterneqartarsimapput, qimmit perlerlutik qilallutillu toqusarput, ilaasalu qimmitik unataannarlugit toquttarpaat. Nunatsinni uumasut nakorsaasa taama naammattuuisarsimanertik Danmarkimi aviisimut Ekstrablademut oqaluttuaraat, oqaluttuaallu Danmarkimi atuarneqarnerpaanut ilaavoq. Ilulissani uumasut nakorsaat marluk qimmeqarfinnut tamanut ukiumut angalasarput. Nakorsap aappaa Elisabeth Mærsk Møller oqarpoq:
- Qimmiminnik paarsilluartorpassuaqarpoq aammali qimmiminnik paarsinerluttorpassuaqarluni, tamannalu pissutigalugu qimmerpassuit saluppallaartut nakkutilliilluta angalasarnitsinni naammattoortarpavut.
Oqarportaaq qimmeqarfinni tamani qimminik naalliutsinneqarsimasunik naammattuuisarnertik maluginiarsimagitsik.
Ilisimaatsuneq qaammaasaqannginnerlu, aammali qimminik iluamik paarsinissamut piumassuseqannginneq, qimmit naalliutsinneqartarnerannut pissutaanerpaasorigini Elisabeth Mærsk Møller oqarpoq.
Uumasunik illersuinermut 2004-imi inatsisitaarpugut, taassumalu saniatigut qimmit tuloriaasa nuuerneqarnissaannut 1956-imeersumik inatsiseqarpoq suli aamma atuuttumik.
Qimminik naalliutsitsisoqarneraalluni saaffiginnittoqaraangat ingerlaannaq iliuuseqarniartarlutik, isorliunerusunullu imaaliallaannaq ornigussinnaasannginnamik politiinut ingerlatitseqqinngikkaangamik, tulliani angalanissamut nalunaarsuisarlutik, Elisabeth Mærsk Møller oqarpoq.
Qimminik naalliutsitsisarneq ajornartorsiutaammat annertooq qimmeqarneq pillugu paasisitsiaanerunissaq pisariaqarluinnarnerarpaa.
- Inuittaaq qimmit pillugit paasinnittanerat allanngortariaqarpoq, inatsit imminermini naammammat, taamaallaanuna innuttaasunit malinneqartariaqartoq, Elisabeth Mærsk Møller erseqqissaavoq.
Danmarkimi aviisimi Ekstrablademi amiilaamminartumik allaaserineqarpoq uumasut nakorsaasa nakkutilliillutik angalasarnerminni naammattoortagaat. Allaaserineqartorlu atuarneqarnerpaat ilaattut nalunaarsugaavoq.
