Kalaallit qallunaanut naleqqiullugit 20-riaammik PCB-mik timiminniittoqarput

Suliffeqarfissuit mingutitsinerisa kingunerisaannik kalaallit ilaat akuutissanik arrortinneqarsinnaanngitsunik PCB-mik qallunaanut naleqqiullugu 20-riaammik annerusumik timiminni peqarput.

Tamanna atuakkami saqqummeqqammersumi atuarneqarneqarsinnaavoq. Atuagaq Århusip Universitetiani avatangiisit pillugit misissuisarfiup Danmarks Miljøundersøgelsip saqqummersitaraa taaguuteqarluni ‘Kalaallit Nunaani akuutissat arrortikkuminaatsut’, qallunaatut miljøgifte i Grønland. Kalaallit nerisamikkut, soorlu timmissanik puisinik arfernillu nerisaqarnermikkut akuutissanik arrortikkuminaatsunik timiminni peqalersarput. Tamanna pisarpoq naak nunatsinni immat Danmarkip imartaanut naleqqiullugit mingutsinneqannginnerugaluartut. Qallunaat Danmarkimeersunik puisitortaraluarunik arfertortaraluarunillu akuutissanik ulorianartunik arrortikkuminaatsunik timiminni peqarnerusimassagaluarput. Akuutissat arrortikkuminaatsut immap sarfaatigut silaannakkullu Aasiamit, Amerikamit Avannarlermit Europamillu nunatsinnut annguttarput.

Kalaallit Tunumiittut Avannaaniittullu timaat akuutissanik arrortikkuminaatsunik akoqarnerupput, tassami illoqarfinni annerusuni uumasunik immameersunik nerisaqartarneq minnerummat nerisassanillu tikisitanik nerisaqartarneq annerusarmat.

Taamaattorli kalaallit nerisaat nerisassanit tikisitanit arlalippassuartigut peqqinnarnerupput. Kalaallit nerisassaataannik nerisaqarneq ajornanngilaq akuutissallu arrortikkuminaatsut killilersimaarlugit, Danmarkimi avataangiisinik misissuisoqarfik, DMU, taama paasissutissiivoq.

Nunatsinni nerisaqarnermut siunnersuisoqatigiit naqitamik saqqummersitsinikuupput taallugu: “Nerisartakkavut eqqasuuteqarata neriuaannarsinnaavavut?” naqitami tassani akuutissanik arrortikkuminaatsunik akulinnik nerisarnerup qanoq ililluni killilersimaarneqarsinnaaneranut innersuussuteqarpoq. Taanna nittartakkami www.paarisa.gl-imi pissarsiarineqarsinnaavoq.