Kalaallit qallunaallu qalasersualerngusaapput

Qalasersuarmik piginnittuunermik aaqqiagiinnginnermi Danmark ajugaassagaluarpat, Qalasersuaq qanoq pineqassanersoq kalaallit qallunaallu assortuussutigissavaat.

Qalasersuaq naalagaaffeqatigiinnermut ilaasaqariaqanngitsoq kalaallit politikeriinit oqaatigineqarpoq, Martin Breum atuakkiamini allappoq. Martin Breum-ip Naalakkersuisut siulittaasuat Kuupik Kleist apersorsimavaa.

Qalasersuup Sikuiutsoq Kujallertulli inissisimalernisaa Kuupik Kleistip orniginartinneruaa, tassalu inoqarani eqqissisimatitaanissaa orniginartinnerullugu.

Qalasersuup pigilernissaanut nunarsuarmiut tamakkerlutik isumaqatigiissinnaagaluarpata tamanna ajussanngikkaluarpoq, Kuupik Kleist atuakkami ilaatigut taama issuarneqarpoq.

- Qalasersuup eqqissisimatitaanissaa kissaatiginarneruvoq, soorlu sakkutooqarnikkut atorneqarnerani. Qalasersuaq tassaavoq nunarsuarmi nunasiffigineqarsimanngitsut kingullersaat, Kuupik Kleist oqarpoq.

Tamanna Danmarkimi naalakkersuisuit suliniutaannut naapertuutinngitsoq, atuakkami aamma atuarneqarsinnaavoq.

Danmarkimi naalakkersuisut annertunerusumik malunnaateqaratik Qalasersuup Danmarkimit pigineqalernissaa suliniutigaat, atukkiartoq Martin Breum atuakkiami allappoq.

Qalasersuarmik piginnittuujumallutik ilungersuuteqartut tassalu Canada, Danmark Ruslandilu arlaannaalluunniit ajugaanavianngillat. Canadami issittoq pillugu ilisimasalik, Michael Byers, naliliivoq.

Imaq, immallu sikua naalagaaffiit arlaannaataluunniit pigilersinnaanngilaat.

Canadap, Danmarkip Ruslandillu Qalasersuarmik sorsuuteqarnerat, nunamik pingaartitsinermik nunamilu namminermi politikkimik pingaartitsinermik tunngassuteqarnerupput, Michael Byers atuakkami, "Når Isen Forsvinder" imi taama allaaserisaqarpoq.