Kalaallit Puerto Ricomut ajorsartut
Kalaallit unammisartuisa arnartaat Puerto Ricomut ataasinngornermi unnukkut sungiusaatigalugu unammigamik arsariaatsit assigiinngitsut misilerarpaat, Puerto Rico aamma taamaaliorpoq. Nunanut allanut unammisartunut sungiusaasoq Johannes Groth taama oqarpoq.
- Unammisaqattaarnissami atorsinnaasatsinnik pissarsivugut. Arsariaatsit ilaat atorsinnaanagit paasivarput, Johannes Groth KNR-imut oqarpoq.
Kalaallit sungiusaatigalugu unamminermi 26-19-mik ajorsarput.
- Straffit pingasut isertinngitsoorpagut periarfissallu arfinillit arfineq marlulluunniit aamma isertinngitsoorlutigit. Unamminerni taamaattuni periarfissat atorluanngikkaanni akisunaarsinartarpoq, sungiusaasoq oqarpoq.
Unamminerli pissarsiffiulluarsimasoq Grothip oqaatigaa.
- Pisariaqartitara pissarsiaraara. Sungiusarnerni tulliuttuni atorsinnaasannik maanna pissarsigama, Groth oqarpoq.
Puerto Ricomi silap kiannerunera silaannaallu isugutannerunera arsartunut sungiunniagassaavoq, unammisaqattaarfissaannilu silaannarissaateqanngimmat tamanna oqinnerulinngilaq.
- Unammisartut unammiffissaq 29-nik kiattoq silaannaalu isugutattoq sungiunniarsaraat, Groth oqarpoq.
NORCA-mi unammisaqattaarnissami sisamanngorpat marsip 30-nit apriilip pingajuata tungaanut pisussami pitsaanerit pingasut Pan Amerikami pissartanngorniuunnissamut anngutissapput.
NORCA-mi kalaallit unammisassaat tassaapput; Puerto Rico, USA aamma Den Dominikanske Republik.
AAMMA ATUARUK Unammisartut Puerto Ricomukarnissamut piareertut