Kalaallit pualavallaalersimapput

Kalaallit sisamaagaagata ataaseq pualavallaarpoq. Ukiuni kingullerni 15-ni kalaallit pualasuut pingasoriaammik amerlisimapput, atuagassiami Samvirke-nimi tamanna atuarneqarsinnaavoq.
februaarip 20-at 2010 13:12

Peter Bjerregaard Kalaallit Nunaanni misissuereernermi kingorna oqarpoq paasisaq amiilaarnartoq.

Orsoqarpallaanik nerisaqalersimaneq aammalu timimik aalatitsivallaannginnerup kinguneranik pualavallaalernermut pissutaasut, nakorsaq Birgit Niclassen oqarpoq, taanna Namminersorlutik Oqartussani siunnersortaavoq.

-Kalaallit qallunaaminernik nerinerulersimapput, kalaalimerngit peqqinnartut nerivallaarunnaarlugit. Nakorsaq Birgit Niclassen aamma oqarpoq, ullumikkut kalaallit allaffimmi issiasut amerlisimasut, qanga piniartuuneq imaluunniit pinialuttarneq salliutinneqarunnaarsimallutik.

Pualavallaalernerup kingunerisarpaa sukkortuunermik nappaateqalerneq, taannalu taaneqartarpoq type 2-mik. Ullumikkut kalaallit 8 procentii sukkortuunermik nappaateqalersimapput.