Kalaallit politikkerit Nordisk Rådimut ataatsimiigiartut
Nunarsuaq tamakkerlugu issittup soqutigineqarnera annertusiartorpoq taamaammat kalaallit politikerit Nordisk Rådimi tusaaniarneqarnerulerput. Tamanna kalaallit ataatsimeeqataasussat iluarisimaarpaat.
- Nordisk Rådimut ataatsimiigiaraangatta sapinngisamik annertunerpaamik sunniuteqarnissaq anguniartarparput. Ukiut ingerlaneranni aamma oqaasissaqarnerulersimavugut nunap pisuussutai atorlugit sunniuteqaqataasinnaalersimagattam, Justus Hansen KNR.gl-mut oqarpoq.
Ataatsimiititaliani assigiinngitsuni ataatsiminnerit saniatigut ataatsimiinneq manna eqqaamaneqassaaq Savalimmiut, Ålandip qeqertaasa nunattalu suleqatigiilernerat pillugu. Suleqatigiinneq taanna aqqutigalugu nunat taakku pingasut sunniuteqarsinnaanerulerput.
- Suleqatigiinnissamut isumaqatigiissut unnugu atsiussavarput taannalu atorlugu Nordisk Rådimi nukittunerusumik inissisimalernissarput naatsorsuutigaarput. Tusaaniarneqarnerulissaagut nunagisatsinni inissisimanerput atorlugu nunat angisuut sunnersinnaavagut, Justus Hansen oqarpoq.
Nordisk Rådip ataatsimiinnera pisortatigoortumik aqagu ammassaq tallimanngornerullu tungaanut ingerlassalluni.
Nordisk Råd annersuumi uani paasisaqarfigisinnaavat: http://www.norden.org/da/nordisk-raad