Kalaallit piumasaqaataat klimaministerimit oqaaseqarfigiumaneqanngiaq
CO2-mik aniatitsinerup qanoq minnerulersinneqarsinnaanera, Kalaallit Nunaata Danmarkillu ataatsimoorlutik misissuiffiginialerpaat. Tamanna tunngavigalugu Danmarkimi silap pissusaanut ministerip, Connie Hedegaardip, silap pissusaa pillugu aappaagu isumaqatigiissuteqarnissami Kalaallit Nunaata immikkut pineqarnissaanik piumasaqarsinnaaneq oqaaseqarfiginianngikkallarpaa.
Allattoq Louise M. Kleemann
decembarip 05-at 2008 08:33
Sulisartut kattuffiata, SIK-p, Sulisitsisut Peqatigiiffiata aamma Nunaqavissut sulisitsisut kattuffiata, NuSuKap, naalakkersuisunut ilaasortaq, Kim Kielsen, kajumissaarpaat, Kalaallit Nunaat suliffissuaqarnikkut ineriartortitsinissamini C02-mik aniatitsinerminik akiliuteqartinneqassappat, silap pissusaa pillugu isumaqatigiissuteqarnissamut peqataaqqunagu.
- Ajornartorsiutit allat pilersitaat pissutigalugit Kalaallit Nunaata aningaasarsiornikkut namminiilersinnaanera ajornakusoornerulissappat tamanna pissusissamisuunngilaq, kattuffiit pineqartut saaffiginnissutiminni ilaatigut allapput.
Silap pissusaanut ministerip, Connie Hedegaardip, saaffiginnissut ilisimasaqarfigaa oqaaseqarfigerusunngikkallarluguli.
