Kalaallit piumasaat naammassineqarsinnaalissapput

Eqqartuussiveqarneq pillugu ataatsimiisitaliarsuup isumaliuutissiissutaa nunatsinniillu piumasarineqartut tamarmik, Danskinit akuersaarneqartoq, Inatsisinik Atortitsinermut Danmarkimi ministerip, Lene Espersenip ullumi Aleqa Hammond-imik ataatsimeeqateqarnermini taama oqarpoq. Ilaqutariinnermut Inatsisinillu Atortitsinermut Naalakkersuisoq, Aleqa Hammond tamanna pillugu ima oqarpoq:

- Ullumi justitsministerimit Lene Espersen-mit aggersarneqarpunga, taannalu oqaasissaqarnerarpoq pingaaruteqartumik. Eqqartuussiveqarneq pillugu ataatsimiisitaliarsuup Kalaallit Nunaanninngaanniit isumaliuutissiissutaat innersuussutalu tamarmik Danmarkiminngaanniit akuerineqartut, Lene Espersen-ip oqarpoq. Kalaallit Nunaanni kissaatigisagut ataatsimoortumik naleqartutut isigineqartariaqartut, naalagaaffiup paasisimavaa. Pitsanngoriaatit tigussaasut siulliit aasartinnagu aallartissapput, tassalu aasaru julip aallaqqaataani, isertitsivik 60-inik inissaqartoq pilersinneqassooq, tassanngaanniillu pinerluuteqarsimasunik utaqqisoqartarunnaarluni ingerlatsineq pilersinnaalerniassammat taamatut aaqqiisoqassaaq. Ukiamut inatsisissat nutaat, tassaasut atortitsinermut inatsit, pinerluttulerinermullu inatsit inatsisartuni folketingimilu ataatsikkut ingerlanneqassapput, naatsorsuutigaarpullu 2008-mi julip aallaqqaataani inatsisit atuutsinneqalissasut, Aleqa Hammond oqarpoq nangillunilu:

- Taasuma kingunerissavaa, nunatsinni eqqartuussiveqarnikkut atugassarititaasunik pitsanngorsaasinnaalerneq. Kommunefofedit aningaasarsiaat malunnaatilimmik qaffanneqassapput, pinerluuteqarsimasullu illersortissai ilinniartinneqarlutik aallartinneqassapput, kredsdommillu atuartinneqarneri aallartinneqassapput isertitsiviillu pisariaqartinneqartut suliarineqarlutik aallartinneqassapput, tassa isertitsiviit ammasut aammalu isertitsiviit matoqqasut piviusunngortinneqarsinnaalissapput. Taama oqarpoq ilaqutariinermut inatsisinillu atortitsinermut naalakkersuisoq Aleqa Hammond.

Suliassat ukioq 2013-ip tungaanut naammassillugit angumeriniarneqassasut, Aleqa Hammond aamma oqarpoq.