Kalaallit pisaat makrelit Islandimut tulaanneqarsinnaalerput

- Islandimiut Aalisarnermut ministeriat saafiginikuuvara, massakullu killiffigaarput Nunatta sineriaani makrelit misileraalluni pisarineqartut Islandimut tulaanneqarsinnaalerneri.

Aalisarnermut Naalakkersuisoq, Ane Hansen oqarpoq.

Nunatta sineriaani aalisakkat makrelit aqqusaaginnartartut, siunissami aningaasarsiutaalersinnaaneri eqqarsaatigalugit, Nunatsinni aalisakkanik tunitsiviit, Royal Greenlandip aamma Polar Seafoodip kilisaataatai maanna misileraallutik makerilinik 10.000 tonsinik Tunumi pisaqarsinnaapput, kilisaatilli Islandimut tulaassinnaaneri Islandimiunit ajornasaartinneqarsimagaluarpoq, Nunatsinni aalisakkerivinnit, ilaatigut Polar Seafoodip siulersuisuunerisa siulittaasuannik, Henrik Lethimik erloqisitsinermik kinguneqartumik.

- Aalisakkat nunat marluusut akornanniittut Islandimut tunineqassappata tamanna isumaqatigiissusiornikkut aatsaat anguneqarsinnaasoq Islandimiut utoqqatsissutigaat. Taamali oqarneq tunngavissaqanngilaq tassami inatsimmik taamaattumik soqanngilaq. Nunat allamiut Islandimut siorna tulaassuipput, Nunarpulli taamaaliornialermat tassa ajornasaartitsillutik.

Polar Seafoodip siulersuisuunerini siulittaasoq, Henrik Leth taama oqarpqoq.

Aalisarnermut Naalakkersuisup, Ane Hansenip oqaatigaa, makrelinik misiliilluni aalisarneq ukiuni pingasuni ingerlanneqareersoq, suli ukiuni pingasuni ingerlanneqarnissaa ilimagineqarsinnaasoq. Ukiullu taakku qaangiuppata makrelit Nunatsinni aningaasarsiutaasinnaaneri isumalluarnarsinnaasoq oqaatigalugu.

- Ukiuni kingullerni pingasuni misileraalluni aalisarnerup takutippa makrelinik aalisarneq ukiut tamaasa alisartunut pitsanngoriaateqartartoq, Ane Hansen oqarpoq.

Makrelit siunissami aningaasarsiutaalersinnaanerinik Aalisarnermut Naalakkersuisup eqqarsaateqarnera, Polar Seafoodip siulersuisuunerini siulittaasup, Henrik Lethip nuannaarutigaa.

- Nanatta makrelinik siunissami aningaasarsiorsinnaanera uangut aamma pisinnaatitaaffigigipput, Ane Hansenip nunanut allanut taama nalunaaruteqarnera pissusissamisoorpoq. Mannamut ilisimanngikkaluarparput makrelit qanoq amerlatiginersut, siunissarli eqqarsaatigalugu nunat allamiut paasitittariaqarpavut aamma uangut pisinnaatitaaffeqaratta aalisarnissatisnnut.

Polar Seafoodip siulersuisuunerisa siulittaasuat, Henrik Leth taama oqarpoq.