Kalaallit pinerluttulersaarutaat nunanit allanit nuannarineqarluartoq
Nunatsinnit pinerluttulersaarut ”Pigen uden hud” apriilip 27-ani saqqummersinneqannginnermini nunat 13-it naqiteriviinut tunineqarsimavoq. Soqutigineqarluarnera killitsinnaqisoq, Mads Peder Nordbo oqarpoq.
- Uani oqaatigineqarsinnaavoq, danskit atuakkiaat taama siusitsigisumi taama tunineqalereertiginikuunngillat. Taamaammat killitsinnaqaaq uppernanngingajalluni. Qiimmatsannissarluunnit nalunangajappoq, sulimi tamanna paasisinnaanngilara, Mads Peder Nordbo oqarpoq.
AAMMA ATUARUK Atuakkiat nunatsinneersut immikkut taaguuteqalersut
Mads Peder Nordbo naapertorlugu tamanna nukappiaqqap takorlugaa piviusunngortuuvoq.
- Atuakkiortoorusuttuaannarsimavunga, atuakkiortoorusunnermilli tamatumanillu inuussutissarsiornissap oqaatiginissaa pilersaarutaavoq piviusorsiunngitsoq. tassami iluatsitsinissamik periarfissat annikitsuararsuupput.
Tamannali iluatsillualermat taassuma nuannaarutigaa.
Atuakkiami Nunatsinni pisuusaartinneqartumi, tusagassiortoq toqutsisoqarsimanerani suliani akuliutsinneqartoq allaaserineqarpoq.
Pinerluttulersaarut Mads Peder Norbop Nuummi najugaqarnermini misigisartagaanut malugisartagaanullu aamma akunniliussineruvoq.
- Kusanartorpassuaqarpormi aammali taarnersiorfeqarluni. Tamakkuli tamarmik atuakkiami ataatsimi ilaatikkusuppakka. Uani ilaatinniarsaraakka. Oqariartuuteqarusuppunga, neriuppungalu aamma taamaaliorlunga. Maannalu atuartussat naatsorsuutigisanniit amerlanerujussuulermata nuannaarutigineqaara.
Nunattalu tutsuiginartumik atuakkiami nassuiaatigineqarnera nunanit allanit taama soqutigineqalertigineranut peqqutaasoq nunani allani naqiterivinneersut oqarluttuarigaat, Mads Peder Nordbo oqarpoq.
- Atuagaq avataaniit allagaanngitsoq malugineqarsinnaavoq, atuagaavoq Kalaallit Nunaannit atuiinnanngitsoq. Atuagaq Kalaallit Nunaata ilagaa. Maani suliarineqarpoq, maani eqqarsaatigineqarpoq, maani inuulluni, Mads Peder Nordbo oqarpoq.
Danskit aviisiata Jyllandspostenip kalaallit pinerluttulersaarutaat soqutigineqaleriartortut pinerluttulersaarutitut nutaat Nuuk Noirimit taagorneqalersimasut marsip qaammataa aallartittoq allaaseraa.
Mads Peder Nordbop atuakkiat taamaattut nunani allani saqutigineqaleriartornerannut nammineq iluatsitsilluarnerminit peqquteqanngissoraa, pinerluttulersaarutimmi taaguutigilersimasaat nunani allani suli isimaneqanngilaq. Kalaallillu atuakkiortut allat atuakkiami soqutigineqarneranit iluaqutserneqarsinnaanissaat taassuma neriuutigaa.
- Nuuk Noirimut ilaavunga, neriuutigaaralu atuakkiama naqiteriviit kalaallinit danskinilluunniit atuakkiarineqartunut eqqummaarinnerulissasut.
Atuagaq danskisut allanneqarsimasoq ”Pigen uden hud” apriilip 27-ani saqqummissaaq.