Assi: Kriminalforsorgen i Grønland

Kalaallit pineqaatissinneqarsimasut pillugit isumaqatigiissut Folketingimi taperserneqartoq

Kalaallinut piffissami killiligaanngitsumi Herstedvesterimiitinneqartunut Nuummiissinnaanermut pisinnaatitaaffimmut tunngasoq ukiuni qulikkuutaani ilungersuutigineqareerluni Folketingimi amerlanerussuteqartunit sisamanngornermi taperserneqarpoq.

Nuunnerulli kingorna peqqissimissuteqarsinnaanissamut tunngatillugu Aleqa Hammondip siunnersuutaa akerlilerneqarpoq.

Inatsisissatut siunnersuut piffissami sivisuumi utaqqineqarsimasoq tassa, kalaallit piffissami killiligaanngitsumi pineqaatissinneqarsimasut Nuummi parnaarussivissamiissinnaalernissaannut qulakkeerisussaq folketingimi sisamanngornermi siullermeerneqarmat isumaqatigiittoqarpoq.

Tamanna kalaallinut piffissami killiligaanngitsumi pineqaatissinneqarsimasunut ullumikkut Danmarkimi Herstedvesterimiittunut aamma atuuppoq.

Siunnersuut 1990-ikkunneersuuvoq, Kalaallit Nunaannilu Eqqartuussiveqarnermi ataatsimiititaliap 2003-mi isumaliutissiissutaaniilluni, aatsaalli 2017-imi ukiakkut Inatsisartuni inatsisissatut siunnersuutitut ilaalerluni, tassani inatsisinut ataatsimiititaliami isumaqatigiissutaasumik taperserneqarpoq.

Tamannali Kalaallit Nunaata Danmarkillu akornanni oqaluttuarisaanermi nikanarsaataavoq, tassami inatsit piffissami taama sivisutigisumik piareersarneqarmat, Folketingimut ilaasortat Aleqa Hammond (NQ) Aaja Chemnitz Larsenilu (IA) isumaqarput. Kisianni, Aaja Chemnitz Larsen oqarpoq:

- Iluanngilaq, kisianni maanna maaniilernera sammissallugu pingaaruteqarsoraara.

Isumaliutissiissutip sivitsorneqarnissaanut siunnersuut isornartorsiorneqartoq

Inatsisissatut siunnersuut kalaallit pineqaatissinneqarsimasut Herstedvesterimit Nuummut parnaarussivimmut nutaamut nuuttut peqqissimissuteqarsinnaanerannik periarfissamik ilaqarpoq.

AAMMA ATUARUK  Piffissami killiligaanngitsumi inissiisarfimmiitinneqartut nuunnertik peqqissimissutigisinnaassagaat

Nuunnertik peqqissimissutigigunikku Herstedvesterimut uteqqinnissartik qaammatit arfinillit iluanni periarfissarivaat. Tamanna kalaallit pineqaatissinneqarsimasut piffissap ingerlanerani nunatsinnut attuumassutaarukkiartorsimasinnaanerannik paasinninnermiippoq.

Aleqa Hammondili naapertorlugu peqqissimissuteqarsinnaatitaaneq ukiumi ataatsimi atuuttariaqaraluarpoq, pineqaatissinneqarsimasut taamaalillutik nunarput ukiumi ataatsimi najoqqaarsinnaalissavaat. Tamannali Socialdemokraatit Kalaallit Nunaannut oqaaseqartartuata, Karin Gaardstedip itigartitsissutigaa.

- Qaammatit arfinillit ajunngilluinnarsoraakka (...). Kalaaliugaannimi (nunap, aaqq.) qanoq innera ilisimalluarneqartarpoq, Karin Gaardsted KNR-imut oqarpoq.

Aaja Chemnitz Larsenillu isornartorsiuineq suliap ingerlanerani kingusingaatsiartumi takkussoraa. Isumaliutissiissutillu sivitsorneqarnissaa iluamik tunngavilersorneqannginnerarpaa.

AAMMA ATUARUK Atornerluisimasut sakkortunerusumik pineqaatissinneqartalernissaat naammanngilaq

- Herstedvesterimiittut Kalaallit Nunaat nalunngilaat. Aamma naak ukiut 15-it 20-lluunniit matuma siorna kingullermik najugaqarfigisimagaluarunikku. Ukiup ataatsip qanoq ingerlasarnera nalunngilaat. Aamma ukioq ataaseq sivisoorujussuusoraara. Taamaammat siunnersuut una taperserpara, Aaja Chemnitz Larsen oqarpoq.

Kalaallilli pineqaatissinneqarsimasut Herstedvesterimiittut immikkut pisinnaatitaaffiit ukiunit marlunnit sivisunerusumik tigummiinnassagaat, Aleqa Hammondip Aaja Chemnitz Larsenillu kissaatigaat.

Inatsisissatulli siunnersuutip suliarineqarnera Aleqa Hammondip peqataaffiginngilaa. Mittarfiliortiterneq pillugu inatsisissap Inatsisartuni aappassaaneerneqarnissaa peqataaffiginiarlugu Nuummiiginnarnissani toqqarsimavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat