' Kalaallit pillugit ilisimasaqarpallaanngillat'

Aalborgimi Kalaallit Illuutaanni pisortap, Jan Thrusøep ippassaq unnukkut radioaviisimi oqaluttuaraa, Aalborgimi kalaallit atuisut 2009-miit 2010-mut marloriaatinngorlutik amerleriarujussuarsimanerannik Kofoeds Skolemit oqariartuutigineqartoq nammineq upperivallaarnagu.

Aammalumi Kofoeds Skolemi sulisut  Kalaallit Illutaanni sulisunut sanilliullutik kalaallit kulturiannik ilisimasaqannginnersut maanna pasitsaappaa.

- Kofoeds Skolemut sanilliullugit sulisugut kalaallit pillugit ilisimasaqarnerusutut sullissipput, aammalumi sulinerminni misilittakkatigut ilisimasaqarnerupput, Jan Thrusøe oqarpoq.

- Soorunami taamaalilluta kalaaliussusermut atatillugu uagut annertunerusumik takunnissinnaavugut. Kalaallimmi kulturiannut paasisimasaqarnerunerput tassaagunarpoq assigiinngissutsitta ilaat. Ilaatigullumi isumaqartarpunga taamatut paasisimasaqarneq allani takussaanngitsoq, Jan Thrusøe oqarpoq.

Taassuma isornartorsiuinini Kalaallit Illuutaata Kofoeds Skolellu akornanni pissutsit pitsaanngitsuunerannik pissuteqanngimmat erseqqissaatigaa.

- Akornatsinni ajortoqanngilaq, kisiannili suliaq pisariaqarsorinanngilaq aamma kalaallinik sullitaqarnermut iluaqutaanavianngitsoq isumaqarpunga, Kofoeds Skolep ajornerusunngortitsinera pillugu Jan Thrusøe oqarpoq.

Taanna isumaqarpoq kalaallit ikittunnguit, inuuniarnikkut ajornartorsiuteqartut isiginiarneruneqartartut, pitsaasumillu inuuneqartut pillugit oqaluttuartoqanngippallaartoq.

- Inuit arlaqanngitsunnguit tusagassiuutini uteqattaartumik tusartuarpagut, isumaqarpunga tamanna uggornartuusoq tassami allarluinnarnik kalaallinik Danmarkimi najugartoqarpoq.

Jan Thrusøep oqaaseqarfigisai pillugit ullup ingerlanerani Kofoeds Skole oqaaseqaateqarniarpoq.