Kalaallit peqqissusaat misissorneqalerpoq

Karen Elise Jensenip aningaasaateqarfianiit 13 mio. koruuninik aningaasaliissuteqartoqarneratigut inuit peqqissusaannik misissuinissarsuaq tulleq qulakkeerneqarpoq.

Misissuinerlu ukiuni 2005-imiit 2009-mut ingerlanneqassaaq.

Peqqissutsimut Pisortaqarfik misissuinermut qullersaalluni akisussaassaaq, misissuisuussalluni;

Kalaallit Nunaanni innuttaasut peqqinnissaannut qullersaqarfia, tassa Center for Sundhedforskning i Grønland – taannalu Naalagaaffiup Innuttaasut Peqqinnissaannut Pisortaqarfimmiittuuvoq, tassa Statens Institut for Folkesundhedip iluaniilluni.

Suliniummut siunertaavoq, 1993-p 1994-llu akornanni kalaallit peqqissutsikkut qanoq issusiata malinnaavigineqarnissaa, taamatullu Inuit Health in Transition-ip, kalaallisut taallugu, Inuit Peqqissusaasa allanngoriartornerata, kalaallinut tunngasortaata pilersinneqarnissaa.

Kingulleq taaneqartoq, Steno Diabetes Center aamma ilisimatusartut Canadameersut Alaskameersullu suleqatigalugit suliarineqassaaq. Samminiarneqarput; nerisat, nukersornartunik sulinerit, inuuniarnikkullu atugarisat sukkortarnermut uummammillu taqqatigut napparsimalertarnermut pissutaasinnaanersut.

Erseqqissaatigineqarpoq, inersimasunik oqaloqatiginninnerit nunatsinni tamaneersut aallartereersut, nappaatit pillugit oqaloqatiginninnerit 2500-t ingerlareerput, aaversinnerillu aamma ingerlallutik.

Qaqortumi misissuinerit ingerlanneqareerput, Aasiannilu misissuinerit ukiortaareerpat ingerlanneqassapput. Nuummi Upernavimmilu tamatuma kingorna misissuisoqassallunittaaq.