Frederiksenimut §37-mik akissut: Kalaallit Peqqissartut illuanni kalaaliminertugassaqarluarpoq

Anton Frederiksen Inatsisartuni ilaasortartut akornanni Naalakkersuisunut §37 naapertorlugu apeqquteqaatinit atuinerpaat ilagaat. Ilaatigulli kukkusinnaasarpoq. Assersuutigalugu Peqqissutsimut naalakkersuisumut Agathe Fontainimut apeqquteqaatimini kingullermi:

- Sooruna Danmarkimi napparsimasut angerlarsimaffianni kalaallit napparsimasut kalaaliminernik nerisinneqassaarsimasut? Frederiksen taama aperivoq.

Taamaattoqanngilarli. Københavnimimi Kalaallit Peqqissartut illuanni kalaalimerngit sassaalliutigineqarluartarput.

- Nassiussat apeqqutaallutik sapaatip akunneranut marloriarluni pingasoriarluniluunniit kalaaliminernik igasoqartarpoq, tamannalu kalaallit nunatsinni peqqinnissaqarfimmit  allaanerunngilaq, Fontain akissutimini taama ilisimatsivoq.

Kalaallit Peqqissartut illuat Københavnip ilaani Østerbromiittoq kalaaliminernik 1079 kiilunik 2016-imi tikisitsisimavoq. Ilaatigullu Lilleholmimit Royal Greenlandimiillu nioqqutissanik pisisoqartartoq, Agathe Fontain taama allappoq.

- Nalinginnaasumik puisip, umimmaap, savap tuttullu neqaanik pisiniartoqartarpoq aammalu  panertuliat qallersuutissallu pisiarineqartarlutik.. Aalisakkanit tunisassiat Royal Greenlandimit pisiarineqartartut tassaanerullutik suluppaakkat, saarulliit, qalerallit, kapisillit pujuukkallu, naalakkersuisoq taama nassiuaavoq.

AAMMA ATUARUK Inatsisartut Naalakkersuisunut apeqqarissaarput