Kalaallit peqatigiiffisa kattuffiat aningaasanut inatsisikkut aningaasaliiffigineqartalerusuttoq
Kattuffiup siulittaasua Bitha Mettelmann ataatsimiinnissaq sioqqullugu taama ilisimatitsissuteqarpoq. Taanna kattuffiup siulersuisuini ilaasortat allat marluk peqatigalugit ataatsimeeqataassaaq.
Kalaallit Danmarkimi peqatigiiffii 23-t Kalaallit Peqatigiiffiisa Kattuffianni Inuimmi ilaasortaapput, kalaallillu Danmarkimi akuunerulernissaannik ilaatigut suliaqarlutik, assersuutigalugu kalaallit Danmarkimiittut pillugit oqaluttuat nuannersut aallaaviginiarneqarlutik.
Kalaallit Danmarkimiittut tallimaagaangata ataaseq kalaaliunini pillugu immikkoortitaasutut misigisaqartarnera aammalu inuiaqatigiinni danskini isummanik pigiliutiinnakkanik kalaallit misigitinneqartarnerat nalunaarusiani arlalinni upernaaq saqqummiussisoqareersoq kattuffik taama kissaateqarpoq.
Kalaallit peqatigiiffiisa kattuffiata kajumissutsimik suliaqarnerup, Danmarkimi kalaallit peqatigiiffiisa ingerlattagaata, naalagaaffimmit aningaasalersugaalernissaa ullumi ataatsimiinnermi politikerinut kimigiiserutiginiarpaa.
Kalaallit Danmarkimiittut innuttaasuulluarnissaat anguniarlugu kajumissutsimik suliaqarnitsinnut aningaasanik qinnuteqartuarnitsinnut taarsiullugu aalajangersimasumik aningaasaliiffigineqartalernissarput orniginartinneruarput, Bitha Mettelmann KNR-imut taama oqarpoq.
