Kalaallit parnaarussat tusarnaartitsissapput
Erinarsorlutik tusarnaartitsisussat tassapput, kalaallit Herstedvesterimi parnaarussat – taaguuteqartinneqartut Cantica Groenlandica – taakku tusarnaartitseqatigissavaat Københavnimi politiit erinarsoqatigiivi – politiillu taakku angutinik 20-nik erinarsortoqarput.
Tusarnaartitsinissaq taanna immikkuullarissuuvoq, tassami kalaallit parnaarussat Herstedvesterimi parnaarussiviup avataani siusinnerusukkut erinarsorsimanngisaannarput. Taamatullu aamma Københavnimi politiit erinarsoqatigiivisa parnaarussat
tusarnaartitseqatigisimanngisaannarlugit.
Erinarsoqatigiit Cantica Groenlandica arfinillit - arfineq-marlulluunniit akornanni erinarsortoqarput, taakkulu kalaallit tussiutaannik erinarsortarput. Taakkuttaaq ukioq kingulleq juullilermat juullisiutinik tussiarlutik CD-mik immiussipput, immiussaallu Kalaallit Nunaannut parnaarussat ilaqutaannut kammalaataannullu nassiussorneqarpoq.
Apriilip arfineq-pingajuani Roskilde-mi tusarnaartitsinissamut atatillugu plakatiliaq Herstedvesterimi parnaarussat ilaannit titartarneqarpoq.
Taama erinarsorluni tusarnaartitsineq ukiup 2008-p Danmarkimi erinarsornerup ukiuatut toqqarneqarsimaneranut atatinneqarpoq.