Kalaallit palasiat pillugu aaqqiissuteqartoqalinnguatsiarpoq

Kalaallit Danmarkimiittut Ilagiinnit siunissami qanoq sullinneqassanersut ukiuni marlungajanni nalornissutaasimavoq. Tamatuma aaqqinneqarnissaanut sulissuteqarsimasut ilagaat tarnikkut katsorsaasartoq, Henriette Berthelsen.

- Ajornartorsiut sivitsorpallaaleqigami, Henriette Berthelsen oqarpoq.

Kalaallit Danmarkimiittut ilageeqarnikkut sullinneqarnissaminnik soorlu apersortitsiniarunik, katinniarunik ilisiniarunilluunniit qinnuteqaqqaartariaqarnissaat, Danmarkimi kalaallit palasiata, Jens Kristian Kleistip napparsimasunik aamma parnaarussanik sullisseqqaartussaanera pissutigalugu, ukioq manna februaarimi kalaallit biskoppiat kaajallaasitamik nassiussivoq. Naak maannakkumut naammagittaalliuutit marluinnaat takkussimagaluartut, kalaallinik ilageeqarnikkut sullissineq ersarissumik ajorseriarsimasoq, Henriette Berthelsen isumaqarpoq.

- Qanittukkut iluarsineqarnissaa inuit pisariaqartippaat, Henriette Berthelsen oqarpoq.

Kalaallisut naalagiartarnerit amerlasoorpassuarnit nuannaarutigineqartartut taassuma tarnikkut katsorsaasartut misigisarsimavaa.

- Danmarkimi palaseqarnissaq pingaaruteqartorujussuuvoq, inuit tamaani najugallit inuunerannut tarnikkut anersaakkullu pitsaasumik sunniuteqartarami, kalaalerparujussuit sutigut tamatigut periarfissat tamaani atorlugit naalagiariartortarput imaluunniit ilisisoqaraangat ilaasarlutik, Henriette Berthelsen oqarpoq.

Naalagiarnerillumi allanik naapitsinissamik periarfissiillutillu ataqatigiinnermik nukittorsaasartut, taanna isumaqarpoq.

- Soorlu qallunaat Australiami imaluunniit Amerikami oqaluffeqartarput, taakkulu oqaluffiit ulikkaavittarlutik, soorlulusooq oqaluffik aallaavigalugu inuiaqatigiit taamatut katersuussinnaaneq pisariaqartittorujussuusaramikku, Henriette Berthelsen oqarpoq.
 
Kalaallit Folketingemi ilaasortaasartut - qanga maannakkullu ilaasortat - kalaallit piumassutsiminnik Danmarkimiittut palaseqartitaanerat Danmarkimit aningaasalersorneqartariaqarneranik kissaateqartarsimapput.