Kalaallit palasiat Danmarkip akilerumanngilaa

Kalaallit Danmarkimiittut kalaallimik palaseqarnissaat pillugu naalagaaffiup atorfinitsitsinissaa, folketingimut ilaasortap Lars Emil Johansenip kissaataa, Danmarkimi ilageeqarnermut ministerip Birte Rønn Hornbechip itigartippaa.

Lars Emil Johansenip isumaa naapertorlugu Nunatsinni Naalakkersuisut kalaallit Danmarkimi palasiannut aningaasaliisarunnaarniarmata, ministerimut apeqquteqaateqarpoq, sapaatilli akunneri pingasut qaangiutiinnartut Naalakkersuisut erseqqissaatigaat kalaallisut oqaasilimmik Danmarkimi palaseqarnissaq siunertaralugu suli aningaasaliisarniarlutik.

Palasi Jens Kristian Kleist Danmarkimi maanna palasiuvoq.

Tamannarpiaq tunngavigalugu naalagaaffik aningaasaliinianngitsoq, Birte Rønn Hornbechip akissummini innersuussutigaa.

Naatsumik oqaatigalugu: Namminersorlutik Oqartussat aningaasaliiniarmata, naalagaaffik aningaasaliissanngilaq.