Kalaallit oqaasii pingaarnertut atorneqalissapput

Namminersorneq atuutilerpat kalaallit oqaasii allaffissornermi pingaarnertut atorneqalissapput. Kalaallisut oqalussinnaanngitsut kalaallit oqaasiinik ilinniartinneqartalernissaannik kalaallillu qallunaat oqaasiinik atuisinnaanngitsut qallunaatut ilinniartinneqarsinnaanerannik periarfissinneqassallutik. Oqaasileriffik - Namminersornerullutik Oqartussanut atasoq - tamanna pillugu siunnersuusiorpoq.
Allattoq Louise M. Kleemann
maajip 08-at 2008 12:43

Oqaasileriffiup siorna 2007-imi marsip qaammataani oqaatsitsigut akuunerulersitsinissaq pillugu nalunaarut naalakkersuisoqarfimmut tunniuppaa. Nalunaarummi oqaatsitsigut akuunerulersitsinissaq pillugu inatsisiliortoqassasoq innersuussutigineqarpoq, siunertarineqarluni oqaatsini pingasuusuni nunatsinni atorneqartuni kalaallit oqaasii pingaarnersaassasut.

- Tapertaralugit oqaaserineqassapput danskit tuluillu oqaasii. Oqaatsinik allanik tapertaqarsinnaaneq mattunneqanngilaq, kisianni oqaatsit taakku pingasut pisortat akisussaaffigissagaat innersuussutaavoq. Oqaatsit taakku imminnut tapertariissumik atorneqassappata oqaatsisigut akuunerulersitsinissaq sakkussatut isigaarput, Carl Christian Olsen taamatut oqarpoq.

Namminersornerunermi inatsimmi tunngavigisaani allassimavoq kalaallit oqaasii pingaarnersaallutik oqaasiussapput, kisianni qallunaat oqaasii peqqissaartumik ilinniartitsissutigineqassapput, taavalu oqaatsit marluutillugit pisortaqarnermi atorneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq