Kalaallit oqaasii pillugit inatsisartuni eqqartuipput

Kalaallisut oqalussinnaanngitsut pilliutigalugit, kalaallisuinnaq oqaasillit immikkut inatsisiliullugit salliutinneqarnissaat inatsisartut piareersimaffiginngilaat.

Tamanna erserpoq, tallimanngormat inatsisartuni ataatsimiinnermi Doris Jakobsen-ip siunnersuutai marluk itigartinneqarmata.

Kalaalinngorsaaneq arriippallaamik ingerlasoq, Doris Jakobsen isumaqarpoq. Kalaalinngorsaanissaq eqqartorneqartaraluaqisoq Doris Jakobsen-ip ingerlasoqannginnerarpaa, siunnersuummilu siullermi atorfinitsitsiniartarnerni kalaallisut oqalussinnaanissap salliutinneqartarnissaa siunnersuutigaa. Siunnersuutip aappaani kissaatigaa atorfinitsitsisarnermi ataatsimiisitaliamik pilersitsisoqassasoq, taamaalillunilu allaffissornerup kalaallisut ingerlanneqarnerulernissaa anguneqassammat.

Siunnersuutilli tamarmik inatsisartuni ilaasortanit amerlanerussuteqartunit itigartinneqarput. Taamaallaat Kattusseqatigiit siunnersuutinut tapersersuipput.

Aamma Naalakkersuisut siunnersuutinik itigartitsereersimapput.

Oqallinnermi Siumup oqaaseqartitaa Hans Enoksen oqarpoq, atorfinitsitsisarnerni kalaallisut oqalussinnaanissaq pingaartinneqareersoq.

Jens B. Frederiksen demokratineersoq, kalaallit oqaasiinik ilinniarsimasoq kalaallisut oqaatsit pillugit oqallinnermi peqataavoq:

- Oqarsinnaavunga kalaallit oqaasiinik ilinniarumaneq nukippassuarnik atuiffiusarmat. Ingammik oqaatsinik ilinniarnermi kalaallinit illaatigineqartarneq eqqarsaatigalugu, tassami kukkulaaraanni illaatigineqartarneq naliginnaammat. Jens B Frederiksen oqarpoq. Taannalu Naalakkersuisut siulittaasuannit isumaqatigineqarpoq:

- Kalaallit immitsinnut nakkarsartarnerput unitsittariaqarparput. Nammineerlungami naalakkersuisut siulittaasuattut inissikkama, qallunaatut oqalussinnaannginnera nikanarsaatitut kalaaleqatinnit atorneqarpoq, Hans Enoksen oqarpoq.

Oqaatsigut pillugit tallimanngormat inatsisartuni oqaluuserinnittoqarpoq.