Kalaallit nutaanerusumik oqaluttuarisaanerannik ersarinnerusumik suliaqassalluni piffissanngorsoraa
Lars-Emil Johansen Siumup partiianit Siumukkut ukiunik 30-nngortorsiorneranut atatillugu ataqqinaammik tallimanngormat ilaasortanngortinneqarpoq, maannakkullu atuagaq Lars-Emil Johansenimut tunngasoq aamma saqqummernialerpoq.
Asger Uhd Jepsen, det danske Forlagskompagniet, naqiterisarfianeersoq atuakkiornissamut suliniuteqartuuvoq. Taanna isumaqarpoq kalaallit nutaanerusumik oqaluttuarisaanerannik ersarinnerusumik suliaqassalluni piffissanngortoq.
Maannakkut piffissanngorpoq Kalaallit Nunaata oqaluttuarisaanerani nutaanerusumi politikerit pingaaruteqarsimasut atuakkiarinissaannut suliamik aallartitsinissaq, nalliuttorsiortoqarneranut tunngatillugu inuit nersualaaginnassallugit naammanngimmat.
Taamaattumillu TV-Aviisimi sulisuusoq, Helle Bygum, saaffigisimavara Kalaallit Nunaannut tunngasunik ilisimasaqarluarmat allaaserinnilaaqqullugu, akuerseriarmallu suliaq taanna atuakkiaralugu aallartinneqarpoq.
- Atuakkiassamik suliniuteqartoq aperineqarami qanorpiaq atuagaq isornartorsiuisuunersoq akivoq:
Imatut isornartorsiuisuussaaq, qalipagarsuartut kusanartuliatut isikkoqassannginnami. Nukappiaraq nunaqarfimmi Illorsuarmiu politikip silarsuaanut natermut qillalaartuinnarmut avalassaartoq, tassani Lars-Emiili ajunngittortai ajortortaalu tamaasa ilanngullugit oqalutuariniartussaavarput, soorunami aamma 1960-ikkulli naalerneranniit politikerinngorami ullumimut Nunatsinnut pingaaruteqarsimanera tamakkua tamaasa ilanngullugit oqaluttuarisussaallutigit.
Lars-Emili pillugu oqaaseqassanguma oqaassaanga;
Anguniakkani pillugit takorluuisinnaasarpoq, illua´tungaatigullu kinaassutsini avammut toqqorterneq ajorpaa, inuunermi ilaatigut imigassamik atornerluisunngornini isertuunnagu nassuerutigisimavaa imigassamillu atorluisuunerminit aniguilluni. Aammattaaq saqqummiunniartarsimavaa politikerit pikkorikkaluartulluunniit kukkussuteqarsinnaasarnerat, isumaqarpungalu tamanna pingaaruteqaruinnartoq susoqarsimaneranik paasinnissagaanni. Asger Udh Jepsen naqiterivimmi aaqqissuussisoq taama oqarpoq. Suli ilisimaneqanngikkallarpoq Lars-Emil Johansen pillugu atuakkiaq qaqugu saqqummerumaassanersoq.
