Kalaallit nunasisut danskisut ilinniartinneqarsinnaanngorput
Kalaallit inuusuttut Aalborgimut ilinniariartorlutik aallartartut amerlanersaasa ilinniarnertik unitsiinnartariaqartarpaat. Tamatumunnga pissutaaqataalluinnartarpoq danskisut oqalorippallaannginneq inuiaqatigiinnullu akulerutivinnissamut periarfissalunneq, taama isumaqarpoq Aalborgimi Kofoeds Skole-mi isumaginninnermut siunnersorti, Helle Rønn.
Isornartorsiuineq taanna Aalborgip Kommuneata tusaatissatut tiguaa, maannalu neqeroorutiginialerpaa kalaallit Aalborgimi najugaqalersut inuiaqatigiinnut akulerunnerunissaannut sullissivimmi danskisut ilinniartinneqartalernissaat.
- Sullissivimmik pitsassuarmik peqarpugut, nakorsat nunani allaneersut tassani ilaatigut pikkorissartarpavut. Kalaallit danskit oqaasiinik tassani immaqa aamma ilinniartinneqarsinnaapput, Aalborgip Kommuneani isumaginninnermut siunnersorti, Mai-Britt Iversen, oqarpoq.