Kalaallit nunasisut ajornartorsiuteqarnerusarput
Kalaallit Danmarkimut nunasisut ilaat sivisuumik suliffissaaleqisunngortarput nunasisunullu allanut naleqqiullutik ikiorserneqarnissamut ajornartorsiuteqarnerusarlutik, Danskisut inuttaassuseqareernertik pissutigalugu. Taama saqqummiussaqarpoq kalaallit illuata Odensemiittup nalunaarusiaa qanittukkut saqqummiunneqartoq.
Odensemi kalaallit illuanni siunnersorti Tuperna Madsen ima nassuiaavoq:
- Kalaallit Danmarkimut nuuttartut tamarmik ajornartorsiortuunngillat, kisianni akornanniittoqarpoq ajornartorsiuteqartunik, taakkulu atugaat misissorneqarsimapput.
Kalaallit ilaat sivisuumik suliffissaaleqisuusartut misissuinerup ersersippaa. Kalaallit ilaasa sivisuumik suliffissaaleqisunngortarnerat ikiorserneqarumalluni saaffiginninnissamut tunuarsimaarnermik peqquteqakkajuttoq, Tuperna Madsen oqarpoq.
- Kalaallit Nunaanni illoqarfiit inukitsunguusarput maanilu inuttunerujussuusarlutik, tamanna saaffiginninniarnikkut ajornakusoorutaasarpoq.
Danmarkimut nunasisut nunani allamiut tikikkaangata inuiaqatigiinnut ilanngukkiartuaannissaat aaqqissuuteqqissaagaasarpoq, kalaallilli nunasisut Danmarkip naalagaaffiani inuttaaqataanertik pissutigalugu annertunerusumik suliniuteqarfigineqaratik innuttaasutulli allatut naatsorsuunneqartarput.
-Ikiorsiissutitigut taamaallaat ikiorserneqartarput, qallunaatullu oqalunnissamut nunasisutulli allatut ingerlaannaq pikkorissartinneqassanatik.
Kalaallit Danmarkimi inuuniarnikkut ajornartorsiortut toqqaannartumik saaffigisinnaasaminnikullumikkut immikkut sullissisoqanngillat, taamaallaat namminneerlutik kalaallit illuinut saaffiginnikkunik ikiorneqartarput. Tamanna pillugu toqqaannartumik saaffigisinnaasaannik kommuneqarfigiligaanni kalaallit illui suleqatigalugit immikkut sullissisulerneqartariaqartut, Tuperna Madsen isumaqarpoq.
Odensemi kalaallit illuata nalunaarusiaa Odensep kommunea naalagaaffillu suleqatigalugit piviusunngortinneqarpoq.
Nalunaarusiami eqqaaneqarpoq Odensemi kalaallit 19 procentii pisortat ikiorsiissutaannik pisartagaqartuusut nunasisullu allaneersut taama pisartagaqartut 9 procentiusut.
