Kalaallit nunarsuarmi pissartanngorniunnerni peqataalerput
Sapaatip akunneri marluk qaangiuppata assammik arsartartut nunarsuarmi pissartanngorniunnerat aallartissaaq. Unammineq Tyskalndimi pissaaq, kalaallillu tassani aamma unammeqataassapput.
Kalaallit Silkeborgemi massakkut sungiusarput, sungiusarnertillu kingusinnerusukkut Frankrigemi Mulhausenimi nangissavaat.
Kalaallit Slovianiamiunut januaarip 20-ianni unammeqqaassapput, unamminissamullu piareersimalluartut unammisartut sinnerlugit tusarliisartoq Carl Johan Colberg oqarpoq.
Kalaallit unamminissaannut kalaaleqatit isiginnaariartussat 100 missaanniippalupput.
Carl Johan Colberg oqarpoq kalaallit isiginnaartut qiimmassaalluartaqimmata isiginnaartut allat aamma ilaaqqutiinnartartut.
Assammik arsarluni nunarsuarmi pissartanngorniunnerit KNR TV-kut aallakaatinneqarumaarput, kalaallillu unamminerini oqaluttuusassapput Noah Mølgaard aamma Palle Lennert.
