Skaale: Kalaallit Nunaata tunngaviusumik inatsiseqalernissaa isumassarsiatsialaavoq

Kalaallit Nunaata nammineq tunngaviusumik inatsiseqalernissaanut Naalakkersuisoqatigiit nutaat Inatsisartuni qinigaaffiup massuma naalernerani siunnersuusiorniarnerat tusaramiuk, Savalimmiuni socialdemokratit sinnerlugit Folketingimut ilaasortaq Sjurdur Skaale taama oqarpoq.

Tunngaviusumillu inatsit iluatsissappat Inatsisartunit tamanit tapersersorneqarnissaq pingaaruteqartoq, Sjurdur Skaalep oqaatigaa. Savalimmiormiut nammineq tunngaviusumik inatsiseqalernissaannut ataatsimiititaliarsuarmi taanna nammineq ilaasortaavoq.

Aamma atuaruk Savalimmiormiut tunngaviusumik inatsit pillugu taasilersut

- Siunnersuutit amerlanerussuteqaqqalaaginnarnikkut akuersissutigigaanni qajannarsinnaapput. Amerlanerussuteqarluartut tapersersuisariaqarput. Danmarkimut ataannarnissamik tapersersuisut, avissaartoqarnissaanillu tapersersuisut ataatsimoorfigisinnaasaannik peqartoqartariaqarpoq, Sjurdur Skaale oqarpoq.

Kalaallit Nunaata namminerisamik tunngaviusumik inatsiseqalernissaa Danmarkimi amerlanerussuteqarluartut tapersersorpaat, Danmarkilli tunngaviusumik inatsisaata iluani tamanna pissappat aatsaat tapersersuillutik.

Aamma atuaruk Lagmandi: Savalimmiut tunngaviusumik inatsisissaat piariilerpoq

Dansk Folkeparti assingusumik isumaqarpoq. Partiilli taassuma Kalaallit Nunaannut tunngasunut oqaaseqartartuata Søren Espersenip tunngaviusumik inatsit sumut atorneqassanersoq apeqquserpaa:

- Piareersimatinneqarsinnaavoq, massakkorpiarli atorfissaqartinneqarnavianngilaq. Kalaallit Nunaatami namminiilivittunngornissaa pillugu innuttaasut taasitinneqaqqaartariaqassapput. Taamaalereerpat tunngaviusumik inatsisit suulluunniit siunnersuutigineqarsinnaalissapput. Inatsisissatulli siunnersuusiornissamut maanna pissutissaqarsorinngilara, Søren Espersen oqarpoq.