Kalaallit Nunaata siunissaa pillugu oqallipput
Oqallinnermi peqataasut pingasut folketingimut ilaasortaq Juliane Henningsen, aamma Københavnip Universitetiani ilinniartitsisoq Lise Lyck kiisalu tusagassiortoq atuakkiortullu Marianne Krogh Andersenip kalaallit nunaata siunissami unammilligassai pillugit oqallinnermi apeqqutigineqartunut akissuteqartartuupput. Aatsitassat tikinneqarput, aamma ilinniartitaaneq, oqaatsit, kalaallit Danmarkimi najugallit, kiisalu Kalaallit Nunaat siunissami naalagaaffittut namminersorsinnaanera tikinneqarput. Eqqartorneqartut kingulleq peqataasunit assigiinngitsunik isumaqarfigineqarpoq. Tusagassiortup Marianne Krogh-ip imatut isigigaa, Lise Lyck-ip tamanna nalorninartoqartikkaa. Folketingimut ilaasortap Juliane Henningsen isumaqarpoq namminersulivinnissamik isuma piviusorsiortoq. Isumaqarporli qaqugu namminersulivikkumaarnissap ukiulernissaa piviusorsiunngitsoq.
Atuakkiortup Marianne Krogh Andersenip qularutigfinngilaa, Nunarput namminersulivikkumaartoq, apeqquserluguli Naalakkersuisut siulittaasuata Hans Enoksenip 2021-mi namminiilivinnissamik siunniussaqarnera piviusorsiornersoq.
Lise Lyckip piffissami qanittumi nunatta namminersulivinnissaata pinissaa ilimagisinnaanngilaa, pingaartumik ullumikkut aningaasarsiornikkut inissisimaneq eqqarsaatigalugu. Lise Lyck, Finn Lyngep oqaaserisimasaa isumaqatiginartippaa, tassa inuiaqatigiit taama ikitsigitillugit nunatta naalagaaffinngornissaa qularnartoqartikkini. Folketingimut ilaasortap Juliane Henningsenip tamanna ima isumaqarfigaa:
-Massakkut uagut suliassaraarput Namminersornermi suliassat akisussaaffiillu tigoorarnissaanut uagut pisinnaalluta takutissallugu. Nalunngilara naalakkersuisut siulittaasuata Hans Enoksenip 2021-mi Namminersulivinnissamik anguniagaqartoq. Soorunami oqartoqarsinnaavoq anguniagaqarneq pitsaasuusoq, kisianni isumaqarpunga neriulussinnartitsinianngikkaanni aammalu periarfissaqarluarluni piffissaqarluarluni peqqissaarlunilu Namminersorneq eqqunniaraanni taava piviusorsiunngitsoq ukiumut aalajangersimasumik taasilluni anguniagaqarnissaq. Isumaqarpunga piffissaq aammalu aningaasaqarnikkut nunatta ineriartornerata aalajangerumaaraa, soorunami aamma inuit aalajangerumaaraat, periarfissaareermat Namminersornermut inatsimmi Namminersulivinnissaq eqqunneqassanesoq aammalu qaqugu eqqunneqassanersoq, Folketingimi ilaasortaq Juliane Henningsen taama oqarpoq.
