Kalaallit Nunaata silaannaata mingutsinneqarnera ukiut tallimat ingerlaneranni 8 procentimik annkilissinniarneqarpoq
Ukiut tallimat qaangiuppata ukioq 2012-imi, mingutsitsineq 8 procentimik appartinneqarnissaa anguniarneqassaaq, Kalaallit Nunaanni silap pissusaata allanngoriartornera pillugu Katuami isumasioqatigiinnermi ullumi ingerlanneqartumi siunniunneqarpoq. Kalaallit Nunat Kyoutomi isumaqatigiissut malillugu nammineerluni nunat tamat isumaqatigiissutaannut ilaanngunnissaa suleqatigiissitaliassami anguniarneqassaaq.
Isumasioqatigiinnermi aaqqissuussisoq, Alfred Jakobsen, Avatangiisit pillugit Pisortaqarfimmi pisortaq radioaviisimut oqarpoq
naalakkersuisunut siunnersuummik saqqummiussaqassallutik , suut sakkugalugit qanorlu iliornikkut 8 procentimik anikillisaaniarneq qanoq anguneqarsinnaanersoq.
Ukiut tallimat ingerlaneranni CO2mik mingutitsineq 8 procentimik appartissinnaaneripput, Alfred Jakobsen-imut apeqqutigigatsigu ima oqarpoq :
”Ullumikkut paasissutissat pigisagut kisisitsillu tunngavigalugit periarfissaqarluarpugut annikillisaanissamik, kisiannili piffissap taassumap iluani, 2008miit 2012ip tungaanut 8 procentimik appaanissaq oqaatigiuminaappoq !” Alfred Jakobsen oqarpoq. Sakkut sorliillu atorlugit CO2 annikillisaaneqassanersoq apeqqutaatinneqarpoq.
Inuiaqatigiinni pisinnaasarput aningaasarsiornikkut allatigullu iluanni periarfissat anguniarneqassapput, Alfred Jakobsen oqarpoq.
Kyotomi isumaqatigiissut, Danmarkip nunallu tamat akornanni isumaqatigiissutigaat, taaamaalilluni Kalaalit Nunaat isumaqatigiissummut ilaalerluni. Alfred Jakobsen tamanna pillugu oqarpoq, suleqatigiissitap pilersinneqartussap suliassaasa ilagigaat Kalaallit Nunaat nammineerluni anguniagai pillugit qallunaat naalakkersuisuinik oqaloqateqarnissaq.
Erngup nukinga atorlugit nukissiuutinik sanaartornissaq, eqqakkanillu ikuallaaviliortoqarnissaq isumasiortunit siunnersuutigineqartut ilagaat.
Innaallagissamik imermillu atuinerup naatsersorneqartarnerisa piumanarsarneqarnissaa siunnersuutigineqartut ilagaat.
