Kalaallit Nunaata Radioata illutaa oquup nungulerpaa
KNR oqummit ima eqqugaasimatigaaq, illup annersaa suliffittut atorneqarsinnaanngitsoq, ISS-ip misissuinerata naammasseqqammersup takutippaa.
- Ilumoorpoq KNR-imi oqoqartorujussuusoq. Immikkoortortaqarfiit ilaat ima oqoqartigaat, tamaani sulinissaq peqqinnanngilluinnarluni. KNR-imi pisortaanerugallartoq, Jan Berg, oqarpoq.
Qanorpiaq pisoqassanersoq suli nalugallarparput. Pisoq nutaajulluinnarpoq. Qanoq pisoqassanersoq siulersuisut Naalakkersuisullu, Nick Nielsenip, aqagu ulloqeqqata siorna ataatsimiissutigissavaat. Tamanna pereerpat siulersuisut ataatsimoorlutik ataatsimiissapput. Aallakaatitassiornermut sulisunullu pisoq kinguneqartussaavoq, maannakkorpiarli annertunerusumik oqaaseqarsinnaanngilagut, Jan Berg oqarpoq.