Kalaallit Nunaata qipoqqartassinneqarnera angusaq angisooq
Kalaallit Nunaat qipoqqartassinneqanngikkuni nunat tamat arfanniarneq pillugu ataatsimiititaliarsuanni IWC-imi ilaasortaaginnarnissani takujuminaatsissimassagaluarpaa. Taamaammat aamma qipoqqartassinneqarnissamik isumaqatiginniarnermi IWC-mit aninissamik sioorasaarineq sakkutut atorneqarpoq. Isumaqatigiinniarnerit ilungersunarsimapput, Kalaallit Nunaata anguniakkani angunngikkunigit IWC-mi ilaasortaaginnarnissaanik takujuminaatsitsinera atorlugu isumaqatiginniarneq ingerlanneqarpoq, taannalu sakkutut atorlugu qipoqqaat qulingiluat pisassiissutigineqarput. Qipoqqaat qulit pisassiissutigineqarnissaat isumaqatiginniarneq aallartimmat piumasarineqarpoq. Ataasiinnarmillu ilanngarneqarnerat angusatut annertuutut Ane Hansenimit oqaatigineqarpoq.
-Nunat arfanniarnermik akerliunissamut qanittut, arfanniarneq pillugu ataatsimiititaliami ilaasortat, Kalaallit Nunaat sinnerlugu aallartitanit oqaloqatigineqarput, tamannalu iluatsippoq, Ane Hansen oqarpoq.
IWC-imi ilaasortat 88-it tamarmik, Kalaallit Nunaata qipoqqartassinneqarnissaanik akuersipput.
Qippoqqarniarnerup septembarip qaammataani aallartissinnaanissaa Piniarnermut Naalakkersuisup Ane Hansenip naatsorsuutigaa, arferit angisuut piniarneqartarnerinut nalunaarut, attuumassuteqartunut tusarniaassutigineqareerpat.
