Kalaallit Nunaata nakkutigineqalernissaanik siunnersuuteqartoqarnera Birthe Rønn Hornbechip akuerisinnaanngilaa
- Nunasiaatilittut pissusilersortoqassanngilaq, taama oqarpoq ministeriunerup Kalaallit Nunaat pillugu qanimut tusarniaavigisartagaa siulleq, Birthe Rønn Hornbech.
- Dansk Folke Partip Kalaallit Nunaata nakkutigineqalernissaanik eqqartuinerat tusarpara, tamanna soorunami akuersaarneqarsinnaanngilluinnarpoq. Namminersorneq pillugu isumalioqatigiissitami killormut suliniuteqarpugut, tassa Kalaallit Nunaata nammineernerulernissaa anguniarlugu suligatta, taamaammat una siunnersuut nunasiaatilittut pissusilersorneruvoq, tamanna akuersaarsinnaanngilluinnarpara, Birthe Rønn Hornbech, Venstre sinnerlugu Folketingimi ilaasortaasoq.
Isumaginninneq pillugu suliat Kalaallit Nunaata qangali oqartussaaffigilerpai, tamaammat akuliunnissaq Birthe Rønn Hornbechip mianersuutigaa. Meeqqalli atugarisaat pillugit Naalagaaffiit Peqatigiiffinni aalajangersakkat unioqqutinneqarpata naalagaaffik akuliuttariaqassasoq oqaatigaa.
– Neriuppungali kalaallit namminneq ikiortissarsiussasut, ikiuunnissarput tamakkerlugu ikiuukkusuppugut, kalaallillu danskinut ikiortissanik tikkuussippata, namminnerlu saaffiginnippata pissusissamisuussaaq naalakkersuisut siulittaasuat naalagaaffiullu ministeriunera ingillutik oqaloqatigiinnissaat, Birthe Rønn Hornbech taama oqarpoq.
Atorfilittat ikiorneqarnissaat, isumaginninneq pillugu Danmarkimi pisortaqarfiup paasisassasiorfiginissaa, kommuninilu ingerlatsinerannik paasisassarsiornerit, siunnersortitigullu atukkiisoqarnissa Birthe Rønn Hornbækip takorloorsinnaanerarpai.
Meeqqat Kalaallit Nunaanni atugaat DR-ip aallakaatitassiaani ” Kalaallit Nunaannit qimarranneq”-mi takutinneqartut nuanninngillat, iliuuseqartoqartariaqarporlu, Birthe Rønn Hornbech oqarpoq.
