Kalaallit Nunaata aningaasatigut inissisimanera Folketingemi aqagu oqallisigineqassaaq

Apeqquteqaat aallaavigalugu oqallinnermi sammineqassapput Namminersorlutik Oqartussat missingersuutaanni annertuunik amigartoorutit, suliffissaaleqisut amerliartornerat, piitsut amerliartornerat aningaasaliisinnaasunik amigaateqarneq aamma Kalaallit Nunaannit avammut noorartut ajornartorsiutaanerat.

Taakkua saniatigut partiit ministeriunermit tusarusuppaat, danskit naalakkersuisui Kalaallit Nunaata annertuumik ajornartorsiornerani ikiuussinnaanerminnut pilersaarutigigunnagaat suunersut.

Inuit Ataqatigiit sinnerlugit Folketingemut ilaasortaatitaq Johan Lund Olsen oqallinnermi peqataassamaarpoq oqallisigineqartussarli nuannarivallaanngilaa.

- Soorunami oqallinnermut peqataassaanga, ilaatigullu oqaatigilersaarlugu, aallaavittut isumaqarama, inatsisartut kikkulluunniit nunap allap aningaasaqarnerata oqallisiginissaanik siunniussinerat pissusissamisuunngitsoq. Kisianni Inuit Ataqatigiit naleqqatigiilluni suleqatigiinnissaq pilersitsiffiulluartumillu oqaloqatigiilluarnissaq angorusuppaat, tamannalu anersaaralugu oqallinnermut peqataassaanga, tusagassiutinut nalunaarummini allappoq.

Oqallinneq toqaannartumik ugguuna malinnaavigineqarsinnaassaaq.