Kalaallit Nunaata ajornartorsiutai saqqumiunneqassapput
Taama oqarpoq silap pissusaanut attaveqaqatigiinnermullu Danmarkimi qullersaqarfiup pisortaa Michael Pedersen, Tysklandimi Bonn-imi silap pissusaata allanngoriartornera pillugu ataatsimeeqataasoq oqaaseqaqqullugu Radioaviisip sianerfigimmagu.
Isumaqarpunga maani najuunnissaq pingaaruteqartoq. Tassa oqallittunut ilaalluni, Kalaallit Nunaatalu qanoq inissisimanera qanorlu isummersimanera saqqummiullugit. Aamma silap pissusaa pillugu isumaqatigiissutissamut suut Kalaallit Nunaannut ajoqutaassanersut suullu iluaqutaassanersut oqaluuseralugit, Michael Pedersen oqarpoq.
Michael Pedersen Danmarkimi silap pissusaanut attaveqaqatigiinnermullu qullersaqarfimmi pisortaavoq, maannalu nunat tamalaat Tysklandimi Bonn-imi ataatsimeeqatigiinneranni Nunarput sinnerlugu ataatsimeeqataalluni. Taassumali silap pissusaa pillugu isumaqatigiissutissami Kalaallit Nuaat annerusumik sunniuteqarsinnaanngitsoq nassuerutigaa.
- Kalaallit Nunaata ajornartorsiutai erseqqissarneqartariaqarput, oqarluta Kalaallit Nunaat silap pissusaata allanngoriartorneranut akisussaaqataajumavoq, taamaattorli nuna namminersulersussaavoq, inuutissarsiornermillu ineriartortitsinissamik pisariaqartitsilluni. Kalaallit Nunaanni ineriartortinneqartussat tassaapput aatsitassarsiorneq uuliasiornerlu. Aamma taamatut ineriartortitsineq CO2-mik annerusumik mingutsitsinermik kinguneqassaaq, tamannalu isumaqatigiissummi ilaatikkusupparput.
Michael Pedersenip ilanngullugu oqaatigaa, Kalaallit Nunaat ineriartortinneqassappat mingutsitsineq annerulissasoq. Taamatut isummerneq silap pissusaa pillugu oqallinnermi nunanit ineriartortunit tunngavilersuutigineqartarpoq. Taamaattorli Michael Pedersen isumaqarpoq, Kalaallit Nunaat nunatut ineriartortutut isigineqartariaqanngitsoq.
- Nunanit ineriartornikkut appasinnerusunit allaninngaanniit Kalaallit Nunaat aningaasarsiornikkut imminut napatissinnaanerulissappat, inuussutissarsiorneq ineriartortinneqartariaqarpoq, tassa aatsitassarsiornikkut uuliasiornikkullu, tamatumalu CO2-mik mingutsitsineruneq kingunerisussaavaa, Michael Pedersen naggasiivoq.
Bonnimi ataatsimeeqatigiinneq juunip aqqarnata tungaanut ingerlanneqassaaq, decembarimilu Københavnimi ataatsimeersuarnissamut piareersarenerulluni.
Bonn-imi ataatsimeeqatigiinneq juunip aqqarnata tungaanut ingerlanneqassaaq, Decembarimilu Københavnimi ataatsimeersuarnissamut piareersarnerulluni.
