Assi: GHF.gl

Kalaallit Nunaat Uruguayimut ajorsarpoq

Arnat assammik arsarlutik nunanut allanut unammisartut nunatsinneersut assammik arsarluni nunarsuarmi pissartanngorniuunnissamut Danmarkimi decembarimi pisussamut peqataassanngillat.

Uruguayimut ippassaq 27-21-mik ajorsarnerisa kingorna tamanna paasinarsivoq.

Nunanut allanut unammisartut sungiusaasuat Jakob Andreassen KNR-imut sms-erluni allappoq unammisartuvut aallartilluaraluartut unamminerullu muminnerani målinik tallimanik siuaqqagaluartut.

Unammisartulli qasoqqanerat unamminerup immikkoortuata aappaani malunniuppoq. Unammisartoqatigiit amerlagisassaanngitsut ullut arfineq-pingasut ingerlanerini arfineq-marloriarlutik unammipput tamannalu naggataagut malunnarsilluni.

AAMMA ATUARUK Arnat assammik arsartartut Mexico ajugaaffigaat

Unamminerup naammassiartornerani kalaallit unammisartut arlaqartut anisitaagallarnerat aamma pissutaaqataavoq unamminerlu 27-21-mik inerneqarpoq Uruguayilu ajugaasuulluni.

Arnat assammik arsarlutik nunanut allanut unammisartut taamaasillutik amerikap nunavittaani unammersuartoqarnerani normu 6-inngorput, tamannalu tulluusimaarutigissavarput, nunanut allanut unammisartut sungiusaasuat Jakob Andreassen KNR-imut taama oqarpoq.

- Unammisartut qasujaallisarlugit ineriartortittuarnerisigut ukiuni aggersuni pitsaanerusumik inissittalernissarput siunissamilu nunarsuarmi pissartanngorniunnermut anngussinnaanissarput qularutiginngilara, nunanut allanut unammisartut sungiusaasuat taama allappoq.

Unammisartut Havanamit ippassaq unnukkut timmisartorlutik aallarput, Københavnimullu arfininngorpat ullaakkut tikissallutik.

- Unammisartutta takutitsilluarnerat tulluusimaarutigaara, angalanissatsinnullu aningaasaliisut qujatsavigalugit, Jakob Andreassen taama allappoq, naggataatigullu nunatsinni assammik arsarnermik nuannarisallit tamaasa pilluaqquai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat