Kalaallit Nunaat ullut tamaasa saassunneqartarpoq

Digitalimik Sullissinermut Aqutsisoqarfiup allagaataasa KNR-ip pissarsiai, tamanna takutippaat.

Saassussisut tassaasarput qarasaasianut unioqqutitsillutik pulasartut IT-kkullu allatigut pinerluttut Namminersorlutik Oqartussat qarasaasiaannut paasissutissarsiortut oqartussanulluunniit pinngitsaaliillutik akiliisitsiniartut.

Qarasaasianullu unioqqutitsillutik pulaniarsarisartut ajornartorsiutaasut ilungersunartut, Digitalimik Sullissinermut Aqutsisoqarfimmi IT-qarnikkut ingerlatsinermut aqutsisoq, Tony Ditlevsdal, oqarpoq.

- Ilungersunartorujussuuvoq. Kalaallit Nunaanni IT-mut upalungaarsimaneq, nunat allat upalungaarsimanerattut qaffasitsigissaaq. Pentagoniuppat Nuujuppalluunniit apeqqutaanngilaq, Tony Ditlevsdal oqarpoq.

Isumannaallisaanerli maanna naammappoq. Ikittuinnariarluni qarasaasianut ukiuni kingullerni pulasoqarpoq, saassussinerillu taakku sukkasuumik unitsinneqartut Ditlevsdal oqarpoq.

- Upalungaarsimaneq ukiuni kingullerni suliarisarput pulasoqannginnissaanut sunniuteqarluarpoq, tassalu naammalluni, aqutsisoq oqarpoq.

Isumannaallisaanerulli ineriartortittuarnissaa pingaaruteqarpoq.

- Ineriartortinneqartuartussaavoq, uagullu ineriartortitsiuarpugut. Nunarsuup sinnera uninngaannanngimmat, uagut uninngaannassanngilagut. Inuit pigisaannut qanoq pulanissamut isumassarsisoqartuaannarpoq. Taamaammat pitsanngorsaajuaannarpugut, Tony Ditlevsdal oqarpoq.

Namminersorlutik Oqartussat, taakkulu ingerlatseqatigiiffiisa IT-kkut talui, tassa isumannaallisaattaat,  Digitalimik Sullissinermut Aqutsisoqarfiup isumagaa.