Kalaallit Nunaat: Uatsinnit pikkorinnerungaartut ajorsarfigaagut

Kalaallit assammik arsarnermi nunat allanut unammisartuisa Panamimi Argentinamut ippassaq unammigamik iluatsitsivallaanngillat.
juunip 24-at 2014 04:44

Kalaallit Nunaanni assammik arsartartut kattuffianit unamminerup aallartinnera sammiveqarpallaanngitsutut eqqaaneqaraluartoq, nunatta unammisartui unamminerup immikkoortuani siullermi takutitsilluarput Argentinamiunut naligiilluarlutik.

Minutsit 20-t ingerlareersut 9-9-qqapput, unamminerullu immikkoortuata siulliup naamaassinerani Argentina målinik marluinnarnik siuaqqavoq, 14-raarluni Nunarput 12-eraartoq. Immikkoortup siulliup naammasineqarluni siggartoqarnera ilutigalugu Nunatsinnit isertitsisoqarnera atortussaatinneqanngilaq.

Unamminerulli immikkoortuata aappaani Argentinamiut sukataarlualermata nunatta unammisartui katataagaluattualerput. Saassussinerit iluanngitsinngitsoortalerpaat, minutsillu 20-t ingerlareernerini Argentina 26-15-imik siuaqqalerpoq. Taamaalinerani unammerup qanoq inerneqarnissaa paasinarsereerpoq.

Argentina 33-raarluni ajugaavoq Nunarput 20-raartoq

- Argentinamiunut ajugaasussatut ilimagineqartunut unammisartutsinnit piginnaasaqarnerusunut suleqatigiillaqqinnerusunullu unamminerup immikkoortuani siullermi takutitsiluarpugut. Nukissaqartillutami malinnaalluarpugut, unammisartulli Argentinamiut inuussutissarsiutigalugu unammisartuusut nukissaqarluarnerupput sungiussisimalluarnerullutillu kiisalu aamma uatsinnit tamatigoornerullutik. Taamaakkaluartoq unammisartuvut unamminerup immikkoortuani siullermi takutitsilluarnerannut nersualaarusuppakka, uatsinnillu pikkorinnerungaartunut ullumi ajorsarnerput nassuerutigiinnartariaqarparput, nunanut allanut unammisartunut sungiusaasoq Niels Møller taama nalunaarpoq.

Nunatsinneersoq Akutaaneq Kreutzmann arfinilinnik målerluni unamminermi målernerpaavoq.

Nunatta nunanut allanut unammisartuisa Chile aqagu unammissavaat, Chile Mexicolu ippassaq unammigamik Chile 34-18-imik ajugaavoq. Panamerikami unammiuaarnerni unammisartoqatigiint pingasut nunarsuaq tamakkerlugu unammiuaarnissanut ingerlaqqittussat unammisartutta ilagissagunikkit aqagu ajugaasariaqassapput.

Unnugu unammisussat tassaapput USA-Brasilia aamma Uruguay-Guatemala.