Kalaallit Nunaat Tuluit Nunaanni sammineqalerpoq
Danskit Tuluit Nunaanni oqaluffianni nunarput sammineqartussanngorpoq.
Umiartortut oqaluffianni nunarput sammineqassaaq, februaarillu qaammataani sisamanngornerit pingasut, nunatsinni qanoq inooriaaseqartoqarneranik nerisaqartarnitsinnillu takuniaarusuttut misiliiartorsinnaapput. Aningaasallu isertinneqartut, Tasiilami meeqqat angerlarsimaffiannut tutsinneqassapput.
Pinngortitaq isikkivillu kusanartoq, kalaallit nerisassaataat mamartut, oqalualaallu Kalaallit Nunaanni innuttaasunut ulluinnarsiutaapput.
Kalaallit Nunaat ikittuinnaat misigisarsimasaat qanoq misigisaqarfigisinnaanerlugu Tuluit Nunaanni innuttaasut februaarimi misigisinnaassavaat.
Taama oqarpoq, Tuluit Nunaanni aaqqissueqataasoq, umiartortut palasiat, Ronald Pedersen. Taanna ukiuni tallimani Kangilinnguani najugaqareersimasuuvoq.
- Maani suleqatitta arlallit Kalaallit Nunaat arlaatigut attaveqarfigisarpaat ilaasalu tikittareersimallugu, taamaammat Kalaallit Nunaat, Tuluit Nunaanni innuttaasunut ilisaritissallugu toqqarparput, Ronald Pedersen oqarpoq, nangillunilu: - Aamma maani Londonimi danskerpassuaqarpoq, Kalaallit Nunaata qanoq ittuuneranik ilisimasaqarpianngitsunik, Ronald Pedersen oqarpoq.
Inatsisartuni siulittaasoq Jonathan Motzfeldt, qaaqqusanut akimanernut ilaassaaq, oqalugiaateqassallunilu. Oqalugiarnerata saniatigut kalaallit nerisassaataannik misiliisoqarsinnaassaaq, kalaallillu eqqumiitsuliortuata Thue Kristiansenip eqqumiitsuliai takusarneqarsinnaassallutik. Rasmus Lyberthip peqataaffigisaa filmiliaq, Qaarmarnup Uummataa, takutinneqqassaaq, aammalu nakkutilliisut Siriusikkut pillugit filmiliaq takutinneqassalluni, assilisanillu aamma takutitsisoqassanerata saniatigut oqalugiaatit ingerlanneqassapput. Kalaallit Nunaata ilisaritinnerata saniatigut aningaasanik katersiniarneq ingerlanneqassaaq, aningaasallu sinneqartoorutaasussat affaat Tasiilami meeqqat angerlarsimaffianut nutaamut tunniunneqassasut affaalu oqaluffiup pissagai, Ronald Pedersen naggasiilluni oqarpoq.
Februaarimi sisamanngornerit saqqummersitsiviusussat ullut taassaassapput februarip aallaqqaataat, arfineq-pingajuat 15-iallu.
