Kalaallit Nunaat takornariarfissatut Spaniami ussassaarutigineqalerpoq
Island-imut USA–mullu nunatta kujataata ussassaarutigineqarnerata saniatigut Spaniap illoqarfiisa pingaarnersaani Madrid–imi januaarimi aamma ussassaarutigineqalerpoq, taama oqarpoq Tina Jensen Kujataani Takornariartitsiviup, Destination South Greenland-ip pisortaa.
Spaniaminngaanniinnaq takornariat ukioq manna 500-t tikipput, amerlaqaat. Aamma naliliisoqarnera naapertorlugu aapaagu suli amerlanerit takkuttussapput, tassa taama ilisimatinneqarnerput ippoq, taama nassuiaavoq Tina Jensen. Aamma oqarpoq takornariat nunatta avatangiisaa tupigalugulu takusatik alutorisimaqigaat.
Apeqqutigaara naliliinerit suminngaanniit pissarsiarisimanerai, akivoq, spaniamiut namminneq taama ilisimatitsissimasut aammagooq angalatitsivinnut siornarnit inniminniiumasoqarnerusoq.
- Soorunami taama immikkullaritsigisumik soqutiginninneq suleqataffigissavarput, pilersaarutigaarpullumi aappaagu takornariartitsinissaq sioqqullugu piareersaaqataalernissarput aammalu Spaniami aappaagu ussassaarinissarput sulissutigilereerparput, Tina Jensen Kujataani Takornariartitsivimmi Destination South Greenland-imi pisortaq oqarpoq.
Kujataani Takornariartitsivik siornatigut Spaniami takornarianut usassaarisoqartillugu immikkut tuniniaaveqarsimanngisaannartoq januaarip naalernerani Madrid–imi ussassaarisoqalerpat Greenland Tourism suleqatigalugu tuniniaaveqartussanngorpoq.
- Kisianni aamma soorunami Kujataanut takornariartitsisartut allat periarfissinneqassapput. Nalunngikkaluarparput spaniamiut takornariamik angalatitsivii marluusut, kisianni atuisut siammaseqaat amerlallutillu, tuniagassallu amerlammata soorunami Qaqortumi Takornariartitsivik aamma peqataassaaq, taama naggasiivoq Tina Jensen, Destination South Greenland–ip pisortaa.
Spaniamiut takornarianik angalatitsiviisa Qassiarsummi unnuisarfiutillit, Terra Polares–ip, Greenland Adventure-llu spaniamiut 500-t kujataanut ukioq manna angalatippaat.
