Kalaallit Nunaat suliffissuaqarnikkut ineriartortuarusuppoq

CO2-mik aniatitsineq annikillisarniarlugu silap pissusaa pillugu isumaqatigiissummi nutaami Kalaallit Nunaat immikkut pineqarusuppoq.
Allattoq Elisa Isaksen
decembarip 05-at 2008 16:50

Suliffissuaqarnikkut ineriartortitsineq qulakkeerneqartariaqarpoq, taamaanngippat Kalaallit Nunaat isumaqatigiissutip avataani inissisimassaaq, taama oqarpoq avatangiisit pillugit naalakkersuisoq Kim Kielsen.

- Silap pissusaa pillugu isumaqatigiissutissami Kalaallit Nunaata suliffissuaqarnikkut ineriartornissaa qulakkeerneqartariaqarpoq, taamaanngippat isumaqatigiissutip avataaniittariaqassaagut, Kim Kielsen isumaqarpoq. Tassunga tunngatillugu Kattuffiit, tassa SIK-p, GA-p aamma NUSUKA-p isumaqatigiissutissamut piumasaqaatigisaat isumaqatigai. Aperaarput isumaqarnersoq Kalaallit Nunaat suliffissuaqarnikkut kinguarsimasutut isigineraa, ima akivoq:

- Naamik oqarusunngilanga nunarput kinguarsimasuusoq. Kisiannili aningaasarsiornikkut nammineersinnaanissamik ineriartornissarput sulissutigalugu anguniaripput. Maannakkut marlunnik aatsitassarsiorfeqarpugut, taakkuli matulerput, siunissamili amerlanerulertussaassapput, soorlu aluminiulerfissaq, taanna piviusunngussappat, taannami upernaap ingerlanerani paasinarsissaaq, Kim Kielsen oqarpoq.

Suliffissuaqarnikkut ineriartortitsinerup ingerlannerani gassit silaannarmik kissakkiartortitsisut annikillisinneqarsinnaannginnersut aperigatsinni akivoq- tamanna periarfissaasoq, soorlu aluminiuliorfeqalissappat tamanna nunarsuaq tamaat eqqarsaatigalugu CO2-mik aniatitsineq minnerulertussaasoq. Sumiiffinnimi allani ikummatissat allat soorlu aamarsuit uulialuunniit atorneqassammata, maanili erngup nukinganik atuisoqassasoq, Kim Kielsen oqarpoq. Aamma erseqqissaatigaa nunatsinni suliffissuaqarnikkut ineriartortitsineq unitsinneqarsinnaanngimmat, CO2-mik aniatitsinerup annikillisinnissaanik suliniutit annertunerulernissaat isumaginiartariaqassagipput, ilaatigut imermit nukissiuutit atornerulernerisigut.

- Imaassinnaavoq ukiut qulit qaangiuppata nunarput erngup nukinganik nukissiuutinik atuinera 80 procentimiilersimassasoq, taamaalillunilu nunarsuarmi erngup nukinga atorlugu nukissiuutinik atuinermi siuttuulersoq, taama oqarpoq avatangiisinut naalakkersuisoq Kim Kielsen taama oqarpoq.

Kalaallit Nunaata silap pissusaa pillugu isumaqatigiissutissami peqataannginnissaa

akerlerineqarpoq, folketingimut ilaasortap Juliane Henningsen aviisimut Informationimut oqarpoq, kalaallit Nunaat immikkut ittumik isumaqatigiissusiunngikkaluarluni aamma ingerlasinnaasoq.