Kalaallit Nunaat siunissami imannak isikkoqassaaq
Illussanik titartaasartut nunatsinneersut danmarkimeersullu siunissami illut qanoq issinnaanerinit aasaru Italiami Venedigmi saqqummersitsissaput. Saqqummersitsivik illussanik titartaasartut saqqummersitsisarferaat nunarsuarmi ataqqineqarnerpaaq.
Siunissami illut qanoq ilusilersorneqassappat? Qanoq isilluni silaannaap allanngoriartornera aallavingalugu illulioriaaseq tulluarsarsinnaava? Apeqqutit amma allat angisuut ulluni makkunani naapisimaaqatigiinnerup taaguuteqartinneqartup Future Greenland (Nunatta Siunissaa) akiniarsarivai.
- Inuit ilaat isumaqartarput illussanik titartaasartut inunnut pigissaartunuinnaq illunik kusanartunik titartaasartut, kisianni illussanik titartaasartut suliaat siammasissorujussuupput.
Siunissami meeqqatta ukiut 20-30-t qaangiuppata illussaat qanoq isikkoqassanersut illussanik titartaasartut, ingeniørit namminersortullu kalaallit qallunaallu uani aallarnisaataasumik suleqatigiinnermi takorluukkatik saqqummiuppaat, Kent Martinussen danmarkimi Dansk Arkitektur Centerimeerimi pisortaq taama oqarpoq.
Naapeqatigiinnissamut isumassarsisuuvoq Dansk Arkitekturcenterimi pisortaq Kent Martinussen, Minik Rosingilu aqutsisuulluni.
- Ukiut pingasut kingullit Kalaallit Nunaat qimerloorsimavarput, isumaqaratta Kalaallit Nunaanni ineriartorneq pissanganartuusoq peqataarusukkattalu pitsanngorsaaqataasinnaagattalu, Kent Martinussen taama nassuiaavoq .
Illussanik titartaasartut danmarkimeersut, ulluni makkunani nunatsinniipput paasiniaallutik. Nunatsinnilu suleqatit naapisimaarniarlugit. Naapisimaarnermi oqalungiartut ilagaat, Ineqarnermut Naalakkersuisoq Jens B. Fredetiksen kiisalu Asii Chemnitz Narup Kommuneqarfik Sermersuumi borgmersteriusoq. Oqalugiatigigaat nunatsinni qanoq illuliortariaaseqarnersoq, siunissamilu illuliortariaaseqartoqasissaq qanoq takorloorneraat.
Kent Martinussen aperiraarput illussanik titartaaneq nunatta ineriartorneranut qanoq sunniuteqassanersoq.
- Illussanik titartaasartut inuit atugarisaannik pitsanngorsaasinnaapput, soorlu illut perusuersartarfeqarunik meeqqat toqujaartarnerat annikillisarpoq. Inuit kulturikkut illorsuarmukaannarneq ajorput sorpassuarnik pisoqartarmat, aamma maanngartarput manna illu iserfingiuminarmat kusanarlunilu tassa illussanik titartaasartut illut iserfingiuminarnissaat ilusilersortarpaat, Kent Martinussen taama nassuiaavoq.
Dac-imi pisortaasup nunatsinni illussanik titartaariaaseq Qanormita nassuiarsinnaavaa:
- Nunassinni piffissaq sivikitsuaqqami sorpassuarnik pisoqarnikuuvoq. Qanga inuit issumik sanaanik illoqartarput, ullutsinni qisunnik sanaani illoqartarput, isumaqarpunga illuliortariaaseq siunissami allanngussasoq, Kent Martinussen taama nassuiaavoq .
Nunatsinni illussanik titartaasarfimmeersut arfinillit naapeqatigiinnermi peqataapput, danmarkimeersullu arfineq marluk.
Illussanik titartaasartut nunatsinneersut danmarkimeersorlu, ukioq 2012-mi arlaleriarlutik naapeqqittassapput, Italiami Venedigmi saqqummersitsinissamut piareersaqatingiillutik. Nunatsinni titartaasarfiup Nuummiittup Qarsoq Tegnestuep, saqqummersitsinermi saqqummersissavaat nunatsinni qanoq illulioriaaseqartoqarnersoq.
