Kalaallit Nunaat siuarsagassaanngilaq
Kalaallit Nunaat CO2-mik qanoq annertutigisumik aniatitsissanersoq Kalaallit Nunaata Danmarkillu sukumiisumik isumaqatigiissutiginiareeraallu Connie Hedegaard taama nalunaarpoq.
- Kalaallit Nunaat nunanut siuarsagassanut ilaanngilaq. Kalaallit Nunaanni innuttaasup ataatsip tunisat ataatsimut nalingat 187.000 koruuniusoq inuiaqatigiinnut 2006-imi isertitarisarpaa, Sudanimi innuttaasunut sanilliullugu 14-eriaatingajammik annertunerulluni, Sudan nunanut siuarsagassanut G77-imi maanna siulittaasuuvoq, Connie Hedegaard allappoq. Nangipporlu:
- Kalaallit Nunaat amerlasuutigut siuarsimasuuvoq, Kyotomilu isumaqatigiissummut ilaaniarluni aalajangernikuuvoq, taamaammat CO2-mik aniatitsinerminik annikillisaanissaminut pisussaavoq. Inuutissarsiornikkut ineriartornissamik Kalaalit Nunaat pisariaqartitsisoq, Kalaallit Nunaallu issittumiinnini pissutigalugu arlalitsigut immikkuullarissuummat, qularutissaanngilaq. Taamaammat Danmarkip Kalaallit Nunaatalu sivisuumik silatusaartumik oqaloqatigiissutigisimavaat, tamakku pitsaanerpaamik qanoq aqunneqarsinnaanersut.
Kalaallit Nunaat tassaasoq nuna siuarsagassaq oqallisaalerpoq, Naalakkersuisut siulittaasuat, Kuupik Kleist, qaammat kingulleq oqareersorlu, CO2-mik annerusumik aniatitsisinnaaneq pillugu nunat G77-imik taaneqartartut, tassa nunat siuarsagassat, isumaqatiginiarnissaannut piareersimalluni. Kuupik Kleistilli erseqqissaatigaa, Danmark isumaqatiginiarusunnerullugu.
